ފެނަކަ ކޯޕަރޭޝަނުގެ ހިންގުން ހަރުދަނާކުރުމަށްޓަކައި އެންޓި-ކޮރަޕްޝަން ކޮމިޝަން (އޭސީސީ)ގެ ލަފާ ހޯދައިފިއެވެ.
ސޯޝަލް މީޑިއާ ޕޯސްޓެއްގައި މިއަދު އެ ކުންފުނިން ބުނީ އޭސީސީއާ ގުޅިގެން، އެތަނުގެ ތަޖުރިބާގެ އަލީގައި، ފެނަކައިގެ ހިންގުމުގެ ކަންކަން އިތުރަށް ހަރުދަނާ ކުރުމުގެ ސްޓްރެޓެޖީތަކަށް މަސައްކަތް ކުރަމުން އަންނަ ކަމަށެވެ. އަދި އެ ކުންފުނީގެ އޮޕަރޭޝަންތަައް ހިންގުމުގައި ނަޒާހަތްތެރިކަމާއި ޕްރޮފެޝަނަލިޒަމް ދެމެހެއްޓުމަށްޓަކައި މަސައްކަތް ކުރާނެ ކަމަށް ވެސް ބުނެފައިވެ އެވެ.
ފެނަކަ ހިންގުން ހަރުދަނާ ކުރަން އޭސީސީގެ ލަފާ ހޯދަން މަޝްވަރާތަކެއް ކުރި އިރު، އެ ކުންފުނީގެ މިހާރު މެނޭޖްމަންޓުން ވަނީ ކުރީގެ މެނޭޖްމަންޓުން ފެނަކައިގައި ހިންގާފައިވާ ކޮރަޕްޝަންގެ މައްސަލަތަކެއް ތަހުގީގުކޮށް ދޭން އޭސީސީ އަށް ހުށަހަޅައިފަ އެވެ. އޭގެ ތެރޭގައި ކުރީގެ މެނޭޖިން ޑިރެކްޓަރު މުހައްމަދު ސައީދާ ގުޅޭ މައްސަލަތަކެއް ވެސް ހިމެނެ އެވެ.
މި ސަރުކާރުން ބުނެފައި ވަނީ ވެރިކަމާ ހަވާލުވި އިރު، ކޮރަޕްޝަން ހިންގައި އެންމެ ބޮޑަށް ދަރުވާލާފައި އޮތް ކުންފުންޏަކީ ވެސް ފެނަކަ އެވެ.