އަންނަ މަހު ސިނަމާތަކަށް ގެންނަން ތައްޔާރުވަމުން އަންނަ ބޮލީވުޑްގެ ހޮރޯ-ކޮމެޑީ ފްރެންޗައިޒް "ބޫލް ބުލައްޔާ" ގެ ތިން ވަނަ ބައިން މަޝްހޫރު ބަތަލާ މަދޫރީ ޑިކްސިޓް ފެންނާނެކަން މިއަދު ފިލްމުގެ ރަސްމީ ޓްރެއިލާއާ އެކީ ކަށަވަރުކޮށް ދީފި އެވެ.
ހުނަރުވެރި އަދި އެހާމެ ރީތި ބަތަލާ މި ފިލްމުން ފެންނާނެ ވާހަކަ މިދިޔަ އަހަރުގެ ތެރޭގައި މީގެ ޝޫޓިން ފެށި ފަހުން މީޑިއާތަކުގައި ދިޔައީ ދެކެވެމުންނެވެ، އެކަމަކު މިއަދު "ބޫލް ބުލައްޔާ 3" ގެ ޓްރެއިލާ ދައްކައިލުމާ ހަމައަށް، މަދޫރީ ފިލްމުގައި ހިމެނޭކަން ފިލްމުގެ ޓީމުން އޮތީ ސިއްރުކޮށްފަ އެވެ.
އެހެންވެ މި ފިލްމުން މަދޫރީ ފެންނާނެކަން ކަށަވަރުވުމަކީ ފިލްމަށް އިންތިޒާރު ކުރަމުން އައި އެތައް ބަޔަކަށް ވަރަށް ފޮނި އިންތިތިޒާރެކެވެ. އަދި މިއީ ސިނަމާތަކަށް ގިނަ ބަޔަކު ފިލްމު ބަލަން ޖަމާވާނެ މުހިއްމު އެއް ސަބަބަށް ވާނެ އެވެ "ބޫލް ބުލައްޔާ 3" ގެ ޓްރެއިލާ އިން ފެންނަ ގޮތުގައި ފިލްމުގައި މަދޫރީ ފެންނާނީ ޖިންނި އަވަލާފައިވާ މަންޖްލިކާގެ ރޯލުންނެވެ.
މަދޫރީ އަކީ ކާމިޔާބު އެތައް ފިލްމެއް ކުޅެގެން ބެލުންތެރިންގެ ވަރަށް ބޮޑު ލޯތްބެއް ހޯދާފައިވާ ބަތަލާއެކެވެ. އޭނެ އެންމެ ފަހުން ފެނިފައި ވަނީ 2022 ގައި އެމެޒޯން ޕްރައިމް ވީޑިއޯ އިން ގެނެސްދިން "މަޖާ މާ" އިންނެވެ.
މަދޫރީ 57، ގެ އިތުރުން "ބޫލް ބުލައްޔާ 3" އިން މަންޖްލިކާގެ ރޯލުން 2007 ގެ "ބޫލް ބުލައްޔާ" އިން ވެސް ފެނުނު ވިދިއާ ބަލަން ފެންނާނެ އެވެ.
"ބޫލް ބުލައްޔާ 3" އަކީ ޑައިރެކްޓަރު އަނީސް ބަޒްމީ 2022 ގައި ކާތިކް އާރިއަނާ އެކީ ގެނެސްދިން ކާމިޔާބު ފިލްމު "ބޫލް ބުލައްޔާ 2" ގެ ފޮލޯއެޕެކެވެ. ނަމަވެސް އެ ފިލްމުގެ މައިގަނޑު ރޯލުތަކުގައި ހިމެނުނު ކިއާރާ އަދުވާނީ އާއި ތައްބޫ ތިން ވަނަ ބައިން ނުފެންނާނެ އެވެ.
މި ފަހަރުގެ ފިލްމުގެ ލީޑް ބަތަލާ އަކީ ޓްރިޕްތީ ދިމްރީ އެވެ.
އަންނަ މަހުގެ 1 ގައި "ބޫލް ބުލައްޔާ 3" ބެލުންތެރިންނަށް ދޫކޮށްލާ އިރު، ހަމަ އެ ދުވަހު އަޖޭ ދޭވްގަންގެ "ސިންގަމް އެގެއިން" ވެސް ސިނަމާތަކަށް އަންނާނެ އެވެ.