މަސްތުވާތަކެތި ގަންނަން ލާރި ދޭން އިންޒާރުދީ މަންމައަށް ބިރު ދެއްކި މީހަކު 7 މަހަށް ޖަލަށްލާން ކްރިމިނަލް އިއްޔެ ކޯޓުން ހުކުމްކޮށްފި އެވެ.
އެ މައްސަލާގައި އިއްޔެ ހުކުމްކޮށްފައި ވަނީ އައްޑޫ ހިތަދޫ ދޮންދުބުރިގޭ މުހައްމަދު އާމިރު، 38، ގެ މައްޗަށެވެ.
އޭނަ އަށް 7 މަހުހެ ޖަލު ހުކުމެއް އިއްވި އިިރުގެ، އާމިރުގެ މައްޗަށް ދައުލަތުން ދެ ދައުވާއެއް ކުރި އެވެ. އޭގެ ތެރޭގައި ހިމެނެނީ މުދަލަށް ގެއްލުންދިނުމުގެ ކުށުގެ ދައުވާއާއި ރައްކާތެރިކުރުމުގެ އަމުރާ ހިލާފުވުމުގެ ކުށުގެ ދައުވާ އެވެ.
އާމިރުގެ މައްޗަށް ފެބްރުއަރީ 22، 2022 ގައި މެޖިސްޓްރޭޓް ކޯޓަކުން ރައްކާތެރިކުރުމުގެ އަމުރެއް ވެސް ނެރެފައިވެ އެވެ. އެއީ އޭނަގެ މަންމަ އާއި ދޮންބައްޕަ އަށް ބަހުގެ ހަމަލާ ނުދިނުމަށާއި އިންޒާރުދީ ބިރު ނުދެއްކުމަށާއި ހަޑިހުތުރު ބަހުން ވާހަކަ ނުދެއްކުމަށާއި މަސްތުވާތަކެތި ބޭނުން ކުރުމަށް ފައިސާ ނުހޯދުމަށާއި ގޭގައި ހުންނަ މުދަލަށް ގެއްލުން ނުދިނުމަށުގެ އިތުރުން ގެއްލުން ދީފާނެ ކަމުގެ ބިރުނުދެއްކުމަށް އަމުރުކޮށެވެ. އަދި އެ ދެ މީހުންނަށް ޖިސްމާނީ ގޮތުން އެއްވެސް އަނިޔާއެއް ނުދިނުމަށާއި އެ ފަދަ އަނިޔާއެއް ދީފާނެކަމުގެ ބިރު ނުދެއްކުމާއި ނަފްސާނީ އަނިޔާ ނުކުރުމަށް ވެސް އާމިރުގެ މައްޗަށް އަމުރުކޮށްފައިވެ އެވެ.
ނަމަވެސް އޭޕްރީލް 15، 2022 ގެ އިރާކޮޅު މަންމަގެ އަތުން ފައިސާ ހޯދަން މަސައްކަތްކޮށް ފައިސާ ނުލިބުމުން ގޭގެ ކައްކާ ބައިގައި ހުރި މިކްސަރު ތަށިގަނޑު ހަލާކުކޮށް ރޮށިލާ ތަށީގެ މަތިގަނޑު ފަޅާލައިފައިވާ ކަމަށް އާމިރުގެ މައްޗަށް އިއްވި ހުކުމުގައި ބުނެފައިވެ އެވެ.
އަދި އާމިރަށް ކުރި ދެ ދައުވާއަށް އޭނަ އިއުތިރާފު ވެސް ވެފައިވެ އެވެ.
އޭނަގެ މައްޗަށް އިއްވި ހުކުމުގައި ބުނެފައި ވަނީ ހުށަަހެޅި ލިޔުންތަކުން އާމިރުގެ އޭނަގެ މަންމަ އާއި ދޮންބައްޕައަށް ތަކުރާރުކޮށް ގެވެށި އަނިޔާކޮށްފައިވާކަން އެނގޭ ކަމަށާއި އަދި އެކި ދުވަސްމަތިން ބިރުދެއްކުމުގެ އަމަލުތައް ތަކުރާރުވުމުގެ ސަބަބުން މުޅި އާއިލާ ބިރުވެރިކަމެއްގެ ތެރޭގައި އުޅެންޖެހިފައިވާ ކަމަށެވެ.
އަދި މަސްތުވާތަކެތި ގަތުމަށް ލާރި ހޯދުމަށް ބިރު ދައްކައި އުޅުނީ އާމިރުގެ މަންމައަށް ކަމަށް ހުކުމުން ސަފުވެ އެވެ.
ރައްކާތެރިކުރުމުގެ އަމުރާ ހިލާފުވުމުގެ ކުށުގެ ދައުވާގެ އަދަބަކީ ހަ މަހަށް ޖަލަށްލުން ނުވަތަ 15،000ރ. އިން އަށް ވުރެ ބޮޑު ނޫން އަދަދަކުން ޖޫރިމަނާކުރުމެވެ. އަދި އާމިރު ބަންދުގައި ހޭދަކުރި 8 ދުވަސް އުނިކޮށް އެ ދައުވާއާ ގުޅިގެން އޭބަ ތަންފީޒުކުރަން ޖެހޭ ހުކުމަކީ 5 މަހާއި 22 ދުވަސް ކަމަށް ކަނޑައަޅައި ހުކުމްކޮށްފައިވެ އެވެ.
އާމިރުގެ ކުށުގެ ރެކޯޑްތަކުގެ ތެރޭގައި އޮގަސްޓް 22، 2017 ގައި ޑްރަގް ކޯޓުގެ ފަރުވާއިން ވަކިކޮށް ފުރަތަމަ ހުކުމް ތަންފީޒުކުރުމަށް އަމުރުކޮށްފައިވާކަން އެނގޭތީ އެއް ދަރަޖަ މަތިވި ނަމަވެސް އިއުތިރާފުވެފައިވާތީ އެއް ދަރަޖަ ދަށްވާނެ އެވެ. އެހެންކަމުން އެ ދައުވާއާ ގުޅިގެން އާމިރު ތަންފީޒުކުރަން ޖެހޭ އަދަބަކަށް އިތުރު ބަދަލެއް ނާދެ އެވެ.
އެހެންވެ ދެ ދައުވާއާ ގުޅިގެން އާމިރުގެ މައްޗަށް ކްރިމިނަލް ކޯޓުން އިއްވީ 7 މަހާއި 6 ދުވަހުގެ ޖަލު ހުކުމެކެވެ.