ސިންގަޕޫރަށް ހަނީމޫނަށް ދިޔަ ސްޕެއިން ދެމަފިރިޔަކު ހައްޔަރުކޮށް، އެ މީހުންގެ މައްސަލައެއް ތަހުގީގުކުރަން ފަށައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އެ ދެ މީހުން ހަނީމޫނަށް ފަހު މިދިޔަ ހުކުރު ދުވަހު ސިންގަޕޫރުން ފުރަން އުޅެނިކޮށް ހައްޔަރުކުރީ އެއާޕޯޓުން ކަމަށެވެ. އަދި އެ މީހުންގެ ޕާސްޕޯޓްތައް ވެސް ވަނީ ހިފަހައްޓައިފަ އެވެ.
މީޑިއާތަކުން ބުނި ގޮތުގައި ޑާނީ ކްއެސްޓާ ކިޔާ ފިރިހެން މީހާ އާއި އޭނަގެ އަންހެނުން މިރީއާ ސައޭޒް ހިފަހެއްޓީ ހަނީމޫނަށް ސިންގަޕޫރް ހޭދަކުރި ދުވަސްތަކުގައި އެ މީހުންގެ ގައުމަށް ނިސްބަތްވާ އަދި ދެމަފިރިން ވެސް ސަޕޯޓްކުރާ ސްޕެއިންގެ މަޝްހޫރު ފުޓްބޯޅަ ކުލަބް، ވެލެންސިއާގެ ވެރިޔާ، ސިންގަޕޫރަށް ނިސްބަތްވާ ޕީޓާ ލިމްއާ ދެކޮޅަށް "އިހުތިޖާކޮށްފައިވާތީ" އެވެ.
އެގޮތުން ލިމްގެ ސިންގަޕޫރްގެ ގޭގެ ބޭރުގަ އާއި ޓޫރިސްޓުންގެ މެދުގައި މަޝްހޫރު ސިންގަޕޫރްގެ އެކި ތަންތަނުގައި "ލިމް ގޯ ހޯމް" ލިޔެފައިވާ ރީނދޫ ކުލައިގެ ބޯޑެއް ހިފަހައްޓައިގެން ނަގާފައިވާ ފޮޓޯތަކާއި ލިމްއާ ދެކޮޅު ވީޑީއޯތަކެއް ސޯޝަލް މީޑިއާގައި ޑާނީ ޕޯސްޓްކޮށްފައިވެ އެވެ.
Hotel Abelia, propietario Peter Lim! Muy feo por cierto.. pic.twitter.com/Fc6QqQykT4
— Dani cuesta (@daaanii1414) October 3, 2024
މީޑިއާތަކުން ބުނީ ސިންގަޕޫރްގެ އާންމު ތަންތާނގާގައި ހުއްދަ ނެތި އެއްވެސް ކަހަލަ ހަރަކާތެއް ހިންގުމަކީ މަނާ ކަމަކަަށްވާތީ ސްޕެއިންގެ ދެމަފިރިން ހިފަހައްޓައި، އެ މީހުންގެ މައްސަލަ ތަހުގީގު ކުރަން ފެށީ ލިމްއާ ދެކޮޅަށް ކުރި "މުޒާހަރާ" އިހުތިޖާޖާ ގުޅިގެން ކަމަށެވެ.
ނަމަވެސް އެ މީހުންގެ މައްޗަށް އެއްވެސް ދައުވާއެއްކުރި ކަމެއް އަދި އިތުރު އެއްވެސް ފިޔަވަޅެއް އެޅިކަމެއް އަދި ސާފެއް ނުވެ އެވެ.
ސިންގަޕޫރް ފާހަގަ ކުރެވިފައި ވަނީ އަބަދު ވެސް ގާނޫނާއި ގަވައިދުތައް ތަންފީޒު ކުރުމުގައި ނަމޫނާ ދައްކާ ގައުމެއްގެ ގޮތުގަ އެެވެ.