އުޒްބެކިސްތާނުގައި ބާއްވާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވޮލީބޯލް ޗެލެންޖް ކަޕް 2024 ގައި ވާދަކުރާ ރާއްޖޭގެ ގައުމީ ފިރިހެން ވޮލީބޯޅަ ޓީމަށް ޖާޒީ ހަވާލުކޮށްފި އެވެ.
ޓީީމުގެ ކުޅުންތެރިންނަށް ޖާޒީ އިއްޔެ ހަވާލުކޮށްދެއްވީ ސްޕޯޓްސް މިނިސްޓަރު ޢަބްދުﷲ ރާފިއު އެވެ.
ކާވާ ވޮލީބޯލް ޗެލެންޖް ކަޕް ކުރިއަ ށްދާނީ މި މަހުގެ 18-24 އަށް އުޒްބެކިސްތާނުގެ ޓަޝްކެންޓުގަ އެވެ. މި މުބާރާތުގައި ހަ ގައުމަކުން ވާދަކުރެ އެވެ. އެއީ ރާއްޖޭގެ އިތުރުން އުޒްބެކިސްތާން، ކިރްގިސްތާން، ތަޖިކިސްތާން، ތުރުކުމެނިސްތާން އަދި އަފްޣާނިސްތާނެވެ.
މުބާރާތުގައި ވާދަކުރާ ގައުމީ ޓީމުގެ ކެޕްޓަނަކީ ތަޖުރިބާކާރު ކުޅުންތެރިޔާ އިސްމާއީލް ސާޖިދު (ކުޑަ ކާއްޓޭ) އެވެ. އަދި ޓީމުގެ ކޯޗަކީ ތަޖުރިބާކާރު ކޯޗް މުޙައްމަދު ޝަރަފެވެ. ޝަރަފްގެ ދަށުން ކުރީގެ މަޝްހޫރު ދެ ކުޅުންތެރިން ކަމަށްވާ އަޙްމަދު އަބްދުލް ކަރީމް (ލޯންގޭ) އާއި އަބްދުﷲ ޖުނައިދު އެސިސްޓަންޓުންގެ ގޮތުގައި މަސައްކަތް ކުރާނެ އެވެ.
ކާވާ ވޮލީބޯލް ޗެލެންޖް ކަޕަށް ތައްޔާރުވުމަށް، ގައުމީ ޓީމު މިއަދު ފުރާނެ އެވެ.