ސްރީ ލަންކަން އެއާލައިންސްގެ އާ ޗެއާމަނަކަށް ސަރަތު ގަނެގޯޑާ އައްޔަންކޮށްފި އެވެ.
އޭނަ މިހާތަނަށް ހުންނެވީ ސްރީ ލަންކާގެ މަޝްހޫރު ކުންފުންޏެއް ކަމަށްވާ ހޭލީސްގެ އެގްޒެކެޓިވް ޑިިރެކްޓަރުގެ މަގާމުގަ އާއި އެލުމެކްސްގެ ޑެޕިއުޓީ ޗެއާމަންގެ މަގާމުގަ އެވެ.
ސަރަތުިއާ އެކީ އެކުލަވައިލި ގައުމީ އެއާލައިންގެ އާ ބޯޑް މެންބަރުންގެ ތެރޭގައި ހިމެނެނީ ބުއްދިކާ ހެވަވަސަން، ސުގަތު ރާޖަޕަކްސެ، އިރަންގާ ރޯހަން ޕީރިސް ގުނިތިލެކެ، ޑީ އަރަންދަރާ، އާންދަ އަތުކޮރަލެ، ލަކްމަލް ރަޓަނަޔަކެގެ އިތުރުން ނިރަންޖަން އަރޫޕްޕްރަގަސަން އެވެ.
ސްރީ ލަންކަން އެއާލައިންސަށް އާ ޗެއާމަނަކަށް އިއްޔެ ސަރަތު އައްޔަންކުރި އިރު، އެންމެ ފަހުން އެ މަގާމުގައި ހުންނެވީ އަޝޯޕް ޕަތިރަގެ އެވެ.
ގެއްލުމުގައި ހިންގަން ޖެހޭ ކަމަށް މިދިޔަ އަހަރުގެ ތެރޭގައި ސްރީ ލަންކަން އެއާލައިންސް ވިއްކައިލަން ސަރުކާރުން ނިންމައި އެކަމަށް މިދިޔަ އަހަރުގެ ސެޕްޓެމްބަރު މަހުގެ ތެރޭގައި ހުޅުވާލި އެވެ. ނަމަވެސް އެ ނިންމުން މި އަހަރުގެ ޖުލައިގައި ސަރުކާރުން ވަނީ ބާތިލުކޮށްފަ އެވެ.
ސްރީ ލަންކަން އާލައިންސް ވުޖޫދަށް އައީ މީގެ 43 އަހަރު ކުރިން 1979 ގަ އެވެ. ފްލީޓްގައި މިހާރު 21 ބޯޓް އޮތް، އެ އެއާލައިންސް 35 މަންޒިލަކަށް ދަތުރުކުރެ އެވެ. ސްރީ ލަންކަން އެއާލައިންސްގެ މުވައްޒަފުންގެ އަދަދު 5،440 އަށް ވުރެ ގިނަ އެވެ.