މަސައްކަތު މާހައުލުގައި ނަފުސާނީ ސިއްޙަތަށް އިސްކަން ދެވިއްޖެނަމަ މުވައްޒަފުންގެ ދުޅަހެޔޮކަން ރަނގަޅުވެ މުއައްސަސާތަކުގެ އުފެއްދުންތެރިކަން އިތުރުވާނެ ހެލްތު މިނިސްޓަރ ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.
މިއަދު ފާހަގަ ކުރަމުން އަންނަ "މެންޓަލް ހެލްތު ޑޭ" އާ ގުޅިގެން މިނިސްޓަރު ވިދާޅުވީ ނަފުސާނީ ބަލީގެ ޙާލަތު ރާއްޖޭގައި ވެސް އެއް ދުވަހުން އަނެއް ދުވަހަށް ނުރައްކާވަމުންދާ ކަމަށެވެ. އެހެންވެ، އެކަކު އަނެކަކަށް އަޅާލައި އޯގާތެރިކަން އިސްކުރުމަށް އިލްތިމާސްކުރެއްވި އެވެ.
ނާޒިމު ވިދާޅުވީ ވަޒީފާގެ މާހައުލުގައި ވެސް މުވައްޒިފުންނަށް ރައްކާތެރި، އަޅާލާ، އޯގާތެރި މަސައްކަތު މާހައުލެއް ބިނާކުރުމަކީ ނަފްސާނީ ގޮތުން ދުޅަހެޔޮ ސިއްޙަތަކަށް މަގުފަހިކޮށްދީ، ވަޒީފާގެ މަޤުޞަދުތައް ހާސިލްކުރުމަށް ވަރަށް ބޭނުންތެރި ކަމެއް ކަމަށެވެ. އަދި ނަފުސާނީ ޞިއްޙަތަށް ފުޅާ ދާއިރާއެއްގައި އިންވެސްޓްކޮށް، ނަފްސާނީ ޞިއްޙަތުގެ ފަރުވާ ފަސޭހައިން ލިބޭނެ އިންތިޒާމު ހަމަޖައްސައި، މި ފަރުވާ އަތޮޅުތެރޭގައި ވެސް ފުޅާކުރުމަކީ ސަރުކާރުގެ އަމާޒެއް ކަމަށް ވިދާޅުވި އެވެ.
މެންޓަލް ހެލްތު ޑޭ މިއަދު ފާހަގަ ކުރަމުން އަންނަ އިރު، ދުނިޔޭގެ ނިސްބަތުގައި ކޮންމެ 8 މީހަކުން އެކަކީ ނަފުސާނީ އުނދަގޫ ތަޙައްމަލު ކުރަމުންދާ މީހެއްކަން ދުނިޔޭގެ ޞިއްހަތު ޖަމްޢިއްޔާއިން ފާހަގަކޮށްފައިވެ އެވެ. އަދި 2022 ވަނަ އަހަރުގެ ޑަބްލިއުއެޗް އޯގެ ސްޓެޕް ސާވޭއިން ހާމަވެފައިވާ ގޮތުން، ޑިޕްރެޝަންގެ އަލާމަތްތައް ކޮންމެ 5 މީހަކުން އެކަކު ތަހައްމަލުކުރަމުން ދެ އެވެ.
މި އަހަރުގެ މެންޓަލް ހެލްތު ޑޭގެ ޝިއާރަކީ "މެންޓަކް ހެލްތު އެޓް ވޯކް" އެވެ.