އަމީތާބް ބައްޗަންގެ ވަރަށް ކާމިޔާބު ފިލްމެއްގެ ދެވަނަ ބައި އެ ރިލީޒްކުރިތާ 46 އަހަރު ފަހުން ހަދަން ޕްލޭންކޮށްފި އެވެ.
އެ ފިލްމަކީ ކުރީގެ ޑައިރެކްޓަރު ޔާޝް ޗޯޕްޅާ 1978 ގައި ގެނެސްދިން އެކްޝަން ޑްރާމާ "ޓްރިޝޫލް" އެވެ. ކާސްޓްގައި ޝަޝީ ކަޕޫރާއި ސަންޖީވް ކުމާރާއި ހެމާ މާލިނީ އާއި ރާކީ ވެސް ހިމެނޭ ފިލްމު ދެވަނަ ބައެއް ހެދުމުގެ ޝައުގުވެރިކަން ފާޅުކުރީ ޕްރޮޑިއުސަރު އާނަންދު ޕަންޑިތު އެވެ.
ކުރީގެ މަޝްހޫރު ދެ ސްކްރީން ރައިޓަރިން ކަމަށްވާ ސަލީމް-ޖާވިދުގެ ސްކްރީންޕްލޭއަކަށް ހެދި "ޓްރިޝޫލް" އަކީ ގުލްޝަން ރާއި ޕްރޮޑިއުސްކުރި ފިލްމެކެވެ.
މިޑް-ޑޭ އަށް ދިން އިންޓަވިއުއެއްގައި އާނަންދު ބުނީ އެ ފިލްމަކީ އޭނަ އެތައް ފަހަރެއްގެ މަތިން ބަލައި ފޫހި ނުވި ފިލްމެއް ކަމަަށާއި ފިލްމީ މަސައްކަތް ކުރަން އެންމެ ބޮޑަށް ހިތްޖެހުނު ސަބަބަކީ ވެސް "ޓްރިޝުލް" ކަމަށެވެ. އަދި އެ ފިލްމުގެ ސަބަބުން އަމީތާބްގެ ވަރަށް ބޮޑު ފޭނަކަށްވެފައިވާތީ، އޭގެ ސީކްއެލްއެއް އަމީތާބާ އެކީ ހަދަން ބޭނުންވާ ކަމަށް ބުންޏެވެ.
"އެކަމުގެ ތައްޔާރީތައް މިހާރު ކުރިއަށް އެބަދޭ." އިތުރު ތަފުސީލަކަށް ނުގޮސް އާނަންދު ބުންޏެވެ.
އޭނަ ޕްރޮޑިއުސްކުރި ހަތަރު ފިލްމެއްގައި އަމީތާބް ކުރިން ވެސް މަސައްކަތްކޮށްފައިވެ އެވެ. އެއީ 2017 ގެ "ސަރުކާރު 3" އާއި 2021 ގެ "ޗެހެރޭ" ގެ އިތުރުން ގުޖްރާތީ ފިލްމު "ފަކްތް މަހީލާއޯ މާތޭ" އެވެ.