އިލްމީ ދިރާސާތައް ކުރަން އިސްލާމިކް ޔުނިވާސިޓީ (އައިޔޫއެމް) އާއި ފަތުވާދޭ އެންމެ މަތީ މަޖިލީހާ ދެމެދު އެއްބަސްވުމެއްގައި މިއަދު ސޮއިކޮށްފި އެވެ.
އައިޔޫއެމްގައި ބޭއްވި ރަަސްމިއްޔާތެއްގައި އެއްބަސްވުމުގައި ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. ޢަލީ ޒާހިރު ބިން ސައީދު ގާސިމެވެ. ފަތުވާ މަޖިލީހުގެ ފަރާތުން ސޮއި ކުރެއްވީ އެ މަޖިލީހުގެ ރައީސް ޝައިޚް ޑރ. މުހައްމަދު ރަޝީދު އިބްރާހީމެވެ.
މި އެއްބަސްވުމުގެ މަގުސަދުތަކުގެ ތެރޭގައި ދިވެހި މުޖުތަމައަށް ދީނީ ގޮތުން އެނގުން އެންމެ މުހިންމުކަމަށް ފެންނަ ނުވަތަ އެންމެ ބޮޑަށް މުޖުތަމައުގައި އޮޅުން އަރާކަމަށް ފެންނަ ކަންކަމާއި ދާއިރާތަކަކީ ކޮބައިކަން ދެނެގަތުމަށް އިލްމީ ދިރާސާތައް ކުރުމާއި ދެ ތަން ގުޅިގެން ދީނީ އެކިއެކި ދާއިރާތަކުން ދީނީ، ޒަމާނީ އަދި އިލްމީ މަސައްކަތްތަކެއް ކުރުން ހިމެނެ އެވެ.
އެގޮތުން ދިރާސާތައް ކުރުމަށްޓަކައި އިލްމުވެރިންގެ އެހީތެރިކަން ފޯރުކޮށް ދިނުމާއި ރާއްޖޭގެ ދީނީ އެއްބައިވަންތަކަމާއި ދީނީ ވަހުދަތު ހިމާޔަތް ކުރުމަށާއި، ދީނުގެ މެދުމިންވުމުގެ ސިޔާސަތު ދެމެހެއްޓުމުގައި އެއްބާރުލުން ދިނުން ވެސް އެއްބަސްވުމުގެ ތެރޭގައި ހިމެނެ އެވެ. އަދި އިލްމީ ފޮތްތައް އެކުލަވައިލުމާއި ތަރުޖަމާ ކުރުމުގައި އެހީތެރިވުމާއި ރާއްޖޭގެ ދީނީ ޢިލްމުވެރިންގެ މެދުގައި ދެނެގަތުމާއި ގާތްކަން ދެމެހެއްޓުމުގެ ބޭނުމުގައި ސެމިނާތައް އިންތިޒާމު ކުރުން ހިމެނެ އެވެ.