ދި ފަހުން އުވާލި މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ) ނިއުސްކާސްޓަރު ނަސްރުﷲ އަބްދުލް ހާދީ އެ ކޯޕަރޭޝަނާއި ދެކޮޅަށް ވަޒީފާ އާއި ބެހޭ ޓްރައިބިއުނަލްގައި ކުރި ދައުވާއާއި ގުޅިގެން، އޭނާ ވަޒީފާ އިން ވަކި ކުރި ދުވަހާ ހަމައަށް ދޭން ޖެހޭ އެލަވްންސާއި އަދި އޭނާ ހުރި ވަޒީފާ ނުވަތަ އެ ފެންވަރުގެ ވަޒީފާއެއް ހަމަޖައްސައި ދިނުމަށް ވަޒީފާ އާ ބެހޭ ޓްރިބިއުނަލް އިން މިއަދު އެމްބީސީގެ މައްޗަށް އަމުރުކޮށްފި އެވެ.
ޓްރިބިއުނަލް އަށް ނަސްރުﷲ ހުށަހެޅި މައްސަލައިގެ ނިންމުމުގައި ވަނީ، "އެމްބީސީގެ މުވައްޒަފުންނަށް ދޭ އެލަވަންސްތަކާއި އެހެނިހެން އިނާޔަތްތައް މި ގަވައިދުގެ 7 ވަނަ މާއްދާގައި ބަޔާންކޮށްފައިވާ ރާއްޖެތެރޭ ރަށެއްގައި ހުންނަ މުވައްޒަފަކަށް މަހަކު ދޭން ޖެހޭ 3،000ރ. އާއި ކޮއްތުގެ ގޮތުގައި މަހަކަށް ދޭން ޖެހޭ 1،800ރ. އާ އެކު 21 މަހަށް ޖުމްލަކޮށް ޖެހޭ 100،800ރ. މައްސަލަ ހުށަހެޅި ނަސްރުﷲ އަބްދުލް ހާދީ އަށް ނަގައި ދިނުމަށް މި މައްސަލަ ބެލި މަޖިލީހުގެ އިއްތިފާގުން ނިންމީ ކަމަށެވެ. "
“އޭނާގެ ވަަޒީފާ އާ ގުޅޭ އެންމެހައި ކަންތައް ހަމަޖައްސައި އޭނާ ވަޒީފާ އިން ވަކި ކުރި ތާރީޙުން ފެށިގެން ވަޒީފާގެ ކަންތައް ހަމަޖެހޭ ދުވަހާ ހަމައަށް ލިބެންވާ މުސާރަ އާއި އިނާޔަތްތަކުގެ ގޮތުގައި ދޭން ޖެހޭ ފައިސާގެ ތެރެއިން ދެ މަސް ދުވަހުގެ ނޯޓިސްގެ ގޮތުގައި ދީފައިވާ ފައިސާ އުނި ކުރުމަށް ފަހު، ޖެހޭ ފައިސާ މިއަދުން [ޖޫން 15، 2015] ފެށިގެން ނަސްރުﷲ އަބްދުލް ހާދީ އަށް 30 ދުވަހުގެ ތެރޭގައި ދިނުމަށް ފަހު، ވަޒީފާ އާ ބެހޭ ޓްރިބިއުނަލް އަށް ލިއުމުން އެންގުމަށް ޕަބްލިކް ސާވިސް މީޑިއާ (އެމްބީސީ) އަށް އަންގައި އަމުރު ކުރީމެވެ.” ޓްރައިބިއުނަލްގެ ނިންމުމުގައި އިތުރަށް ވެއެވެ.
އައްޑޫގައި މަސައްކަތް ކުރަމުން ދަނިކޮށް ޓީވީއެމްގައި 14 އަހަރު މަސައްކަތް ކުރި ނަސްރުﷲ ވަޒީފާ އިން ވަކި ކުރީ ޓީވީ މޯލްޑިވްސް ހިނގަމުން އަންނަ އެމްބީސީ އަށް އިތުރު ގެއްލުންތަކެއް ވެދާނެތީ، ވަޒީފާ އާ ބެހޭ ގާނޫންގެ 25 ވަނަ މާއްދާއަށް ރިޔާއަށްކޮށް ދެ މަސް ދުވަހުގެ މުސާރަ އާއި އެލެވެންސާ އެކު މިއަހަރުގެ ފެބްރުއަރީ މަހުގެ ތެރޭގައެވެ.