އިންޑިއާގެ ތަރިން ކަމަށްވާ ފާތިމާ ސަނާ ޝެއިހާއި އާރް މާދްވަން ރޮމޭންޓިކް ކޮމެޑީއެއްގެ މަސައްކަތް ފަށަން ތައްޔާރުވެއްޖެ އެވެ.
މީޑިއާތަކުން ބުނީ އެ ދެ މީހުން އެކީގައި އަލަށް މަސައްކަތް ކުރަން ހަމަޖެހިފައިވާ މި ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަންގެ ވެބް ކޮންޓެންޓް ގޮފި، ދަރްމެޓިކް އެންޓަޓައިންމަންޓުން ހަދާ ފިލްމެއް ކަމަށެވެ. މި މަހުގެ ފަހުކޮޅު ޝޫޓިން ފަށަން ހަމަޖެހިފައިވާ އެކަމަކު އަދި ނަން ހާމަނުކުރާ ފިލްމުގެ ޑައިރެކްޓަރަކީ ވިވެކް ސޯނީ އެވެ.
އޭނަ އަކީ ދަރުމާ އިން 2021 ގައި ނެޓްފްލިކްސް އަށް ގެނައި ރޮމޭންޓިމް ކޮމެޑީ "މީނާކްޝީ ސުންދޭޝްވަރް" ގެ ޑައިރެކްޓަރެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ ވިވެކްގެ އާ ފިލްމުގައި ކިޔައި ދޭނީ އުމުރުގައި ބޮޑު ފަރަގެއް ހުންނަ ދެ ލޯބިވެރިންގެ ވާހަކަ ކަމަށެވެ. ފާތިމާ، 32، އާއި މާދްވަން، 54، ގެ މި ފިލްމު ވާނީ އެ ދެ ތަރިން ވެސް ދަރުމާގެ ޕްރޮޖެކްޓެއްހައި މަސައްކަތްކުރާ ފުރަތަމަ ފަހަރަށެވެ.
ފާތިމާ ބޮލީވުޑަށް ނުކުތީ އާމިރު ޚާންގެ 2016 ގެ "ޑަންގަލް" އިންނެވެ. މާދްވަން އަކީ ބޮލީވުޑްގެ އިތުރުން އިންޑިއާގެ ދެކުނުގައި ވެސް ނުފޫޒު ގަދަ ތަރިއެކެވެ. އޭނަގެ އެންމެ މަޝްހޫރު ހިންދީ ފިލްމުތަކަކީ "ރެހެނާ ހޭ ތޭރޭ ދިލް މޭ" އާއި "ރަނގް ދެ ބަސަންތީ" އަދި "3 އިޑިއަޓްސް" އެވެ.