ޝަންގްރިއްލާ ވިލިނގިލި ރިސޯޓް އެންޑް ސްޕާގެ ރަން ފިހާރި "ފަޅާލި" މައްސަލައާއި ގުޅިގެން ހައްޔަރު ކުރި އެތަނުގެ 5 މުވައްޒަފުން ކަނޑުމަގުން މާލެ ގެންދިއުމަށް ފުވައްމުލަކުން ފުރުވައިފިއެވެ.
"އައްޑޫލައިވް"އަށް މައުލޫމާތު ލިބިފައިވާގޮތުގައި ރިސޯޓުގައި މަސައްކަތް ކުރާ 5 މުވައްޒިފުން ހައްޔަރުކޮށް ތަހްގީގު ކުރުމަށްފަހު މީގެ ދެދުވަސް ކުރިން ވަނީ ފުވައްމުލަކަށް ގެންގޮސްފައެވެ. އަދި އިތުރު ތަހްގީގަށް ފުވައްމުލަކުން ކަނޑުމަގުން އިއްޔެ ވަނީ އެމީހުން ފުރުވާލާފައެވެ.
ޝަންގްރިއްލާ ރިސޯޓްގެ ރަން ފިހާރަ ފަޅާލާފައިވަނީ އެތަނުގެ ސެކިއުރިޓީ ކެމެރާ "އުޑަށް" އަމާޒުކޮށްފައި ވަނިކޮށެވެ.
މި މައްސަލަ ތަހްގީގު ކުރަމުން އަންނަ އިރު ހާދިސާ އާއި ގުޅިގެން ސެކިއުރިޓީ ބަލަހައްޓާ އެއްވެސް ފަރާތަކާއި ސުވާލުކޮށް ތަހްގީގު ކޮށްފައި ނުވާކަމަށް ވެއެވެ.
"އައްޑޫލައިވް" އާއި ވާހަކަ ދެއްކި ގިނަ މުވައްޒަފުން ވަނީ މިކަން ހިގާދިޔަ ގޮތާއި ގުޅިގެން ކަންބޮޑުވުން ފާޅުކޮށްފައެވެ. އެމީހުން ބުނީ ރިސޯޓަށް ވަޒީފާއަށް ދިއުމަށް ބިރު ގަންނަ ކަމަށެވެ.
"އަޅުގަނޑުމެން މިތިބީ ބޮޑު ބިރުވެރިކަމެއްގައި، ނޭގެ ކޮން އިރަކު ކަން ފުލުހުންގެ ބަންދަށް ގެންދާނީ" މުވައްޒަފަކު ބުންޏެވެ.
ރަން ފިހާރަ ފަޅާލި މައްސަލާގައި ހައްޔަރު ކުރި ޓްރާންސްޕޯޓް ސެކްޝަނުގެ މުވައްޒަފަކީ ހާދިސާ ހިނގިރޭ ޑިއުޓީގައި ހުރި މީހެއް ނޫން ކަމަށް މައުލޫމާތު ލިބިފައިވެއެވެ. އޭނާ ފުލުހުންގެ ބަންދަށް ގެންދިޔައީ ގޭގައި ހުއްޓާ ފުލުހުންގެ އިންޓެލް މީހަކު ގޮސް ކަމަށްވެއެވެ.
މައުލޫމާތު ލިބިފައިވާ ގޮތުގައި ރިސޯޓްގެ ޑިއުޓީގައި ތިއްބާވެސް ބައެއް މުވައްޒަފުން ވަނީ ހައްޔަރުކޮށްފައެވެ. އަދި އެމީހުން ހައްޔަރު ކުރިކަން ރިސޯޓްގެ ފަރާތުން އާއިލާތަކަށް އަންގާފައި ނުވެއެވެ.
ޝަންގްރިއްލާގެ މުވައްޒަފުން ތަކެއް ހައްޔަރުކޮށް ތަހްގީގު ކުރާ މައްސަލަ އާއި ގުޅިގެން އައްޑޫގެ ގިނަ ރައްޔިތުން ވަނީ ބޮޑެތި ކަންބޮޑުވުންތައް ފާޅު ކުރަމުންނެވެ. އެގޮތުން ޝަންގްރިއްލާއިން ވިލިނގިލި ރިސޯޓް ދޫކޮށްލަން އުޅޭ ކަމަށްވެސް ރަށުތެރޭގައި ވަނީ އަޑު ފެތުރިފައެވެ.
ރަންފިހާރަ ފަޅާފައިވާ ހާދިސާގައި ހައްޔަރު ކުރި މީހުންނަކީ ސީދާ ހޮޓެލް މެނޭޖަރުގެ އޯޑަރަށް ހައްޔަރުކޮށްފައިވާ މީހުން ކަމަށް ހަބަރު ލިބެއެވެ.