ކޫއްޑޫ އެއާޕޯޓްގެ ހާލަތު ދަށްވެގެން ގައުމީ އެއާލައިން، މޯލްޑިވިއަން އިން އެ އެއާޕޯޓަށް ވަގުތީ ގޮތުން ހުއްޓާލި ނަމަވެސް އެތަން މަރާމާތުކޮށް އަވަހަށް އަލުން ދަތުރުތައް ފަށާނެ ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި އޭނަ މޯލްޑިވިއަނު އިން ކޫއްޑު އަށް ދަތުރުތައް ހުއްޓާލަން ނިންމީ ދިގު މުއްދަތެއްގައި އެއާޕޯޓް މަރާމާތި ނުކުރެވި އަދި ރަންވޭގެ ހާލަތުގެ ސަބަބުން، މޯލްޑިވިއަންގެ ދެ ބޯޓަކަށް ގެއްލުންވުމާ ގުޅިގެން ކަމަށެވެ.
ނަމަވެސް ޓްރާންސްޕޯޓް މިނިސްޓްރީގެ އިސް ނެގުމާއެކު ސިވިލް އޭވިއޭޝަން އޮތޯރިޓީ އާއި އެއާޕޯޓް އޮޕަރޭޓާ އަދި ގުޅުންހުރި ފަރާތްތަކާ ގުޅިގެން މައްސަލަ ހައްލުކުރުމުގެ މަސައްކަތް ފަށާފައިވާ ކަމަށް މިނިސްޓަރު ވިދާޅުވި އެވެ.
"އިރާދަކުރެއްވިއްޔާ ވަރަށް އަވަހަށް މައްސަލަ ހައްލުކޮށް އެއާޕޯޓް އާންމު ހާލަތަށް ގެނެވޭނެ." އަމީން މިނިސްޓަރު ވިދާޅުވި އެވެ.
މޯލްޑިވިއަން އޮޕަރޭޓްކުރާ އައިލޭންޑް އޭވިއޭޝަން ސާވިސެސް (އައިއޭސް) އިން ބުނެފައި ވަނީ ކޫއްޑޫ އެއާޕޯޓްގެ މަރާމާތު ނިމުނުހާ އަވަހަކަށް ދަތުރުތައް އަލުން ފަށާނެ ކަމަށެވެ. އެ އެއާޕޯޓަށް މޯލްޑިވިއަން ދަތުރުތައް މި ވަގުތަށް މެދުކަނޑާލީ ސްރީ ލަންކަން އެއާލައިންސް އިން އައްޑޫ ގަމަށް ކުރަމުން އަންނަ ދަތުރުތަކުގެ އަދަދު އަންނަ މަހުގެ ތެރޭގައި ތިނެކަށް އިތުރުކޮށް، ގަމާއި ކޫއްޑޫ މޯލްޑިވިއަން މެދުވެރިކޮށް ގުޅައިލަން ހަމަޖެހިފައި ވަނިކޮށެވެ.
ގަމަށް ސްރީ ލަންކަން އިން ކުރާ ދަތުރުތައް އިތުރު ކުރަން ނިންމީ އަންނަ މަހުގެ 14 އިން ފެށިގެންނެވެ. މިއީ ކުރިއަށް އޮތް ޓޫރިޒަމް ޕީކް ސީޒަނާ ގުޅުވައި ނިންމި ނިންމުމެކެވެ.
މޯލްޑިވިއަންގެ ދަތުރުތައް ކޫއްޑު އަށް މެދުކަނޑާލި އިރު، އެ އެއާޕޯޓަކީ 2012 ގައި ހުޅުވި ތަނެކެވެ. އަދި ބޮޑެތި ބޯޓުފަހަރާއި ޖެޓްތަކަށް ޖެއްސޭ ފެންވަރަށް ރަމްވޭ ތަރައްގީކޮށް އަލުން ކޫއްޑޫ އެއާޕޯޓު ހުޅުވީ 2017 ގަ އެވެ.