ޑިސެމްބަރުގައި ރިލީޒްކުރަން ހަމަޖެހިފައިވާ ވަރޫން ދަވަންގެ ފިލްމު "ބޭބީ ޖޯން" ގައި ޖެކީ ޝްރޮފް ކުޅެފައިވާ ނެގަޓިވް ރޯލުން އޭނަ ފެންނާ ގޮތް ދައްކާލައިފި އެވެ.
ކުރިން ވެސް ނެގަޓިވް ރޯލުތަކެއް ކުޅެފައިވާ 67 އަހަރުގެ އެކްޓަރު އެ ފިލްމުގައި ފެންނާނީ ނުރައްކާތެރި ބައްބަރު ޝޭރުގެ ކެރެކްޓާއިންނެވެ. "ބޭބީ ޖޯން" ގެ ކުރިން، އަންނަ މަހު 1 ގައި ރިލީޒްކުރަން ހަމަޖެހިފައިވާ ޑައިރެކްޓަރު ރޯހިތުގެ ޝެޓީގެ "ސިންގަމް އެގެއިން" އިން ވެސް ޖެކީ ފެންނާނެ އެވެ. އަޖޭ ދޭވްގަން ސިންގަމްގެ ރޯލު ކުޅޭ ފްރެންޗައިޒްގެ ތިން ވަނައިގެ ކާސްޓްގައި ޖެކީގެ ދަރިފުޅު ޓައިގާ ޝްރޮފް ވެސް ހިމެނެ އެވެ.
ޑިސެމްބަރު 25 ގައި ސިނަމާތަކަށް ގެންނަން ހަމަޖެހިފައިވާ "ބޭބީ ޖޯން" އަކީ މިދިޔަ އަހަރު ރިލީޒްކުރި ޝާހްރުކް ޚާންގެ "ޖަވާން" ގެ ޑައިރެކްޓަރު އެޓްލީ އާއި ޕްރޮޑިއުސަރު މުރާދު ކެތާނީ ގުޅިގެން ޕްރޮޑިއުސްކޮށްފައިވާ ފިލްމެކެވެ. ކަލީސް ޑައިރެކްޓްކޮށްފައިވާ މި ފިލްމަކީ އެޓްލީ 2016 ގައި ގެނެސްދިން ތަމަޅަ ފިލްމު "ތެރީ ރިމޭކެކެވެ.
ވަރޫންއާ އެކީ "ބޭބީ ޖޯން" އިން ބަތަލާއިންގެ ގޮތުގައި ފެންނާނީ ދެކުނުގެ ބަތަލާ ކީރްތީ ސުރޭޝްގެ އިތުރުން ވަމީގާ ގައްބީ އެވެ. މީގެ އިތުރު ކާސްޓުންގެ ތެރޭގައި ރާޖްޕަލް ޔާދަވް އާއި ޝީބާ ޗައްޑާ ހިމެނެ އެވެ. އަދި "ބޭބީ ޖޯން" ގެ ހާއްސަ ފެނިލުންތަކެއްގައި ސަލްމާން ޚާނާއި ސާނިއާ މަލްއުތުރާ ވެސް ހިމެނެ އެވެ.