މިއަދު ފާހަގަ ކުރަމުން އަންނަ ބައިނަލްއަގުވާމީ ކާރިސީ ހިރާސްތައް ކުޑަކުރުމުގެ ދުވަހާ ގުޅުވައިގެން "ތައްޔާރު" ގެ ނަމުގައި ކާރިސާތަކަށް ހާއްސަ ޓީމްތަކެއް އެކުލަވާލައިފި އެެވެ.
މި ޓީމްތައް އެކުލަވާލާފައި ވަނީ ފެނަކައިން ހިދުމަތް ދޭ 151 ރަށެއްގެ ބްރާންޗަތަކުގެ މުވައްޒަފުންނާ އެކީގަ އެވެ.
އެގޮތުން ޓމްތަކަށް ކާރިސާގެ ޙާލަތްތަކުގައި ޙަރަކާތްތެރިވާން ޖެހޭ ގޮތުގެ ތިއަރީ ތަމްރީނުތަކެއް ވެސް މިއަދު ކުރިއަށް ގެންގޮސްފައިވެ އެވެ. މިއީ، ކާރިސާތަކާއި ކުއްލި ޙާލަތްތަކުގައި ޢަމަލު ކުރާނެގޮތުގެ އިތުރުން، ފެނަކައިގެ ޢިމާރާތްތަކުގައި ހުންނަން ޖެހޭ ސަލާމަތީ މިންގަނޑު، ޔުޓިލިޓީ ރެގިއުލޭޓަރީ ޤަވައިދާ އެއްގޮތަށް އެކުލަވާލުމުގެ މަސައްކަތުގެ ވެސް މުހިއްމު ފިޔަވެއް ކަމަށް ފެނަކަ އިން ބުންޏެވެ.
އެ ކުންފުނިން ވަނީ ކުއްލި ޙާލަތްތަކުގައި އިޖާބަދޭނެ ގޮތުގެ ޢުޞޫލުތަކެއް ވެސް އެކުލަވާލައި ތަންފީޒު ކުރަން ފަށައިފަ އެވެ. މި ޢުޞޫލުގައި، ޤުދުރަތީ ގޮތުން ނުވަތަ އެހެނިހެން ސަބަބުތައް މެދުވެރިވެގެން ކުރިމަތިވާ ކުއްލި ޙާލަތްތަކުގައި ޢަމަލު ކުރަން ޖެހޭ ގޮތްތަކުގެ ތަފްސީލު މުވައްޒަފުންނާ ހިއްސާކޮށްފައިވެ އެވެ.
ފެނަކަ އިން ބުނީ "ތައްޔާރު" އަކީ ކުރިއަށް އޮތް އަހަރެއްހާ ދުވަހަށް ރާވާލެވިފައިވާ ގިނަ ބައިތަކެއްގެ މައްޗަށް އެކުލެވޭ ޙަރަކާތެއް ކަމަށެވެ. އެގޮތުން އެންމެ އިސްކަމެއްގެ ގޮތުގައި، ކުއްލި ޙާލަތްތަކުގައި އަމަލުކުރާނެ ގޮތުގެ އަމަލީ ތަމްރީނުތައް މުވައްޒަފުންނަށް ދިނުމާއި، މި ފަދަ ޙާލަތްތަކަށް ބޭނުން ވާނެ އަސާސީ ސާމާނު، ފެނަކައިގެ ހުރިހާ ބްރާންޗެއްގައި ހުރިކަން ކަށަވަރުކުރާނެ އެވެ.
ކުއްލި ޙާލަތްތަކަށް ތައްޔާރުވުމަށް މުވައްޒަފުންނަށް ބޭނުން ވާނެ ޢަމަލީ ތަމްރީނު ދިނުމަށްޓަކައި، އެމްއެންޑީއެފްއާއެކު މިހާރު ވަނީ މަޝްވަރާތަކެއް ވެސް ފަށައިފަ އެވެ. އަދި ކުރިއަށް އޮތް އަހަރު ދުވަހަށް ބަލާލައިގެން މިފަދަ ތަމްރީނުތައް ކުރިއަށް ގެންދިޔުމަށް އެމްއެންޑީއެފްއާއެކު އެމްއޯޔޫއެއްގައި ސޮއި ކުރަން ހަމަޖެހިފައިވާ ކަމަށް ވެސް ފެނަކަ އިން ބުންޏެވެ.
އެ ކުންފުނިން ބުނީ މަގުަސަދަ ފެނަކައިން ހިންގާ ހުރިހާ އިންޖީނުގެތަކާއި، އާރުއޯ ޕްލާންޓްތައް، ޔުޓިލިޓީ ރެގިއުލޭޓަރީގެ ސަލާމަތީ މިންގަނޑުތަކަށް ފެއްތުމާއެކު، ފެނަކައިގެ ކޮންމެ ބްރާންޗެއްގައި ވެސް ކުއްލި ޙާލަތްތަކަށް ތައްޔާރުވެފައި ތިބި މުވައްޒަފުން ތިބިކަން ޔަގީންކުރުން ކަމަށެވެ.