މަޝްހޫރު ތެލެގޫ އެކްޓަރު ރާމް ޗަރަން އާއި ކިއާރާ އަދުވާނީގެ ފިލްމު "ގޭމް ޗޭންޖާ" އަށް އާ ތާރީހެއް ހަމަޖައްސައިފި އެވެ.
ފިލްމުގެ އާ ޕޯސްޓަރަކާ އެކީ ބުނީ ސިނަމާތަކަށް ފިލްމު ގެންނާނީ އަންނަ އަހަރުގެ ޖެނުއަރީ 10 ގައި ކަމަށެވެ. މިދިޔަ އަހަރުގެ ކުރީކޮޅު ޝޫޓިން ނިންމާފައި އޮތް ފިލްމަކީ ކުޅަދާނަ ޑައިރެކްޓަރު އެސް ޝަންކަރު ގެނެސްދޭ ޕޮލިޓިކަލް އެކްޝަން ތުރިލާއެކެވެ.
"އިންޑިއަން" އާއި "ނަޔަކު" އަދި "ރޮބޮޓް" ފަދަ މަގުބޫލު ފިލްމުތައް ގެނެސްދިން ޝަންކަރްގެ އެންމެ ފަހުގެ ފިލްމަކީ ޖުލައިގައި ރިލީޒްކުރި "އިންޑިއަން" ގެ ސީކްއެލް "އިންޑިއަން 2" އެވެ. ކަމަލް ހަސަނާ އެކީ ގެނެސްދިން އެ ފިލްމަކީ ބެލުންތެރިންގެ ވަރަށް ފިނި ތަރުހީބެއް ލިބުނު ފިލްމެކެވެ.
"ގޭމް ޗޭންޖާ" އަކީ "އާރްއާރްއާރް" ފަދަ ކާމިޔާބު ފިލްމުތައް ކުޅުނު ޗަރަންއާ އެކީ ޝަންކަރް މަސައްކަތްކުރި ފުރަތަމަ ފިލްމެވެ. މި ތެލެގޫ ފިލްމު ހަދާފައި ވަނީ 450 ކްރޯޑް ރުޕީސް 53.5 މިލިއަން ޑޮލަރު) ގެ ބަޖެޓަކުންނެވެ.