އައްޑޫގެ ގުޅިފައިވާ އަވަށްތަކުގެ ކުނި މެނެޖް ކުރުމުގެ މަސައްކަތް ވަގުތީ ގޮތުން ސަރުކާރުން ހަވާލު ކުރި މޯލްޑިވްސް ރޯޑް ޑިވެލޮޕްމަންްޓް ކޯޕަރޭޝަން (އެމްއާރްޑީސީ) އިން ހިލޭ، ގޭގެއިން ކުނި ނެގުމުގެ މަސައްކަތް ފަށައިފި އެވެ.
މި މަސައްކަތް ރަސްމީކޮށް އެ ކުންފުނިން ފެށީ އިއްޔެ އެވެ. އެންވަޔަރަމަންޓް މިނިސްޓްރީން އެމްއާރްޑީސީއާ މަސައްކަތް ހަވާލު ކުރީ މިދިޔަ ބުރާސްފަތި ދުވަހު އެވެ.
އެމްއާރްޑީސީ އިން މައުލޫމާތު ދެއްވާ ވިޔަފާވެެރިންނަށް ވެސް އަގަކާ ނުލައި މިހާރު ކުނިކޮއްޓަށް ކުނި އުކައިލެވޭނެ އިންތިޒާމް ހަމަޖެހިފައިވާ ކަމަށާއި ރަޖިސްޓްރޭޝަނަށް މިހާރު ފުރުސަތު ހުޅުވާލައިފައި އޮތުމުން އެކަން ހަމަޖެހެންދެން އަގަކާ ނުލައި ގޭބިސީތަކުން ކުނި ނަގަމުން ގެންދާނެ ކަމަށެވެ.
ކުނި އުކާލުމުގެ މަސައްކަތް ފަށައިގަތް އިރު، ވެހިކަލްތަކުގެ ދަތިކަން އެމްއާރްޑީސީ އަށް ކުރިމަތިވެފައިވި ނަމަވެސް މިއަދު އިތުރު ތިން ޕިކަޕް ކުއްޔަށް ހިފައިގެން އެ މަސައްކަތް ގެންދަނީ ކުރަމުންނެވެ.
ކުނިކޮށި މީގެ ކުރިން ބެލެހެއްޓީ ހިތަދޫ ސަދަން މޯލްޑިވްސްގެ ފަރާތުންނެވެެ. އެހެން ނަމަވެސް އެ ކުންފުނީގެ އެގްރިމަންޓް އެޕްރީލް 10 ގައި ވަނީ ހަމަވެފަ އެވެ. އެ ކުންފުނިން އިތުރު އެއް މަސް ދުވަހަށް ކުނި ނަގައި ދީފައި، މަސައްކަތް ހުއްޓާލުމުން، ކުނި ނެގޭނެ ގޮތެއް ނެތުމުން އަވަށްތަކަށް ވަނީ ކުނީގެ މައްސަލަ ވަރަށް ބޮޑަށް ކުރިމަތިވެފަ އެވެ.
އެހެންވެ ކައުންސިލުން މަސައްކަތް ކުރީ ކުނި މެނެޖް ކުރުމުގެ މަސައްކަތް ޒެޑް އެންޓަޕްރައިޒަސް ކިޔާ ކުންފުންޏަކާ ހަވާލު ކުރާށެވެ. އެހެން ނަމަވެސް އެކަމުގައި ކޮރަޕްޝަން އެކުލެވޭ ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅި މައްސަލައަކާ ގުޅިގެން، އެ ކުންފުންޏާ އެކު ސޮއި ކުރުން މަޑު ޖައްސާލަން އޭސީސީން ވަނީ ކައުންސިލަށް އަންގައިފަ އެވެ.