އެމްޓީސީސީން ކުންފުނީގެ ސައިޓްތަކުގައި މަސައްކަތްކުރާ ސުޕަވައިޒަރުންނަށް ހާއްސަކޮށްގެން ކުރިއަށްގެން ދިޔަ މަހާސިންތާ ރޭ ނިންމާލައި ފިއެވެ.
އެމްޓީސީސީގެ އެޗްއާރް ޑިޕާޓްމަންޓުން ކުރިއަށް ގެންދިޔަ މަހާސިންތާގައި 107 ސައިޓް ސުޕަވައިޒަރުން ބައިވެރިވި އެވެ. އެގޮތުން ރާއްޖޭގެ އެކި ހިސާބުތަކުގެ ސައިޓްތަކުން ސުޕަވައިޒަރުން ބައިބެރިވި އެވެ.
ދެ ދުވަހުގެ ނިޔަލަށް ކުރިއަށް ގެންދިޔަ މި މަހާސިންތާގައި ސުޕަވައިޒަރުންނަށް މަސައްކަތުގެ މައިދާނުގައި ހުރި ގޮންޖެހުންތަކާއި، އެކަންކަން ހައްލުކުރުމަށް އެޅިދާނެ ފިޔަވަޅުތަކާ ބެހޭ ގޮތުން މައުލޫމާތު ދީފައިވެ އެވެ. މަހާސިންތާގައި ސުޕަވައިޒަރުންނަށް ކަމާބެހޭ މައުލޫމާތުތައް ދީފައިވަނީ، އެމްޓީސީސީގެ ތަޖުރިބާކާރު ދިވެހި މުވައްޒަފުންނެވެ.
އެގޮތުން މަހާސިންތާ ސެޝަންތައް އެމްޓީސީސީގެ އެކި ޑިވިޝަންތަކަށް ނިސްބަތްވާ ވެރިންނާއި ފަންނުވެރިން ނަގައި ދިނެވެ.
ސުޕަވައިޒަރުންގެ މަހާސިންތާ ނިންމާލައި ބައިވެރިންނަށް ސެޓްފިކެޓް ވެސް ދީފައިވާ އިރު، މިއީ އެމްޓީސީސީން މިގޮތަށް ބޭއްވި ތިންވަނަ މަހާސިންތާ އެވެ.
އެމްޓީސީސީން ބުނީ އެ ކުންފުނީގެ މުއައްޒަފުންނަކީ އެންމެ މުހިއްމު ރައުސުލްމާލު ކަމަށާއި މުއައްޒަފުންގެ ކުރިއެރުމަށް ވަރަށް ބޮޑު އިސްކަމެއް ދެމުން އަންނަ ކަމަށެވެ. އެމްޓީސީސީން މިދިޔަ އަހަރު 1،603 މުއައްޒަފުންނަށް އެކި ދާއިރާތަކުން 22،143 ގަޑިއިރުގެ ތަމްރީން ދީފައިވެ އެވެ.