އަންހެނުންގެ ސާފް ޗެމްޕިއަންޝިޕުގައި ވާދަކުރުމަށް ރާއްޖޭގެ ގައުމީ އަންހެން ފުޓްބޯޅަ ޓީމު ނޭޕާލަށް އިއްޔެ ހަވީރު ފުރައިފި އެވެ.
އަންނަ ބުރާސްފަތީގައި ފަށަން ހަމަޖެހިފައިވާ އެ މުބާރާތުގައި ވާދަކުރާ ރާއްޖޭގެ ޓީމުގެ ކޯޗަކީ ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ) އެވެ.
މި މަހުގެ 30 އާ ހަމައަށް ކުރިއަށް ގެންދާ މި މުބާރާތުގައި ދެކުނު އޭޝިއާގެ 7 ގައުމަކުން ވާދަކުރެ އެވެ. މުބާރާތުގެ ހުރިހާ މެޗެއް ވެސް ކުޅުމަށް ހަމަޖެހިފައި ވަނީ ކަތަމަންޑޫގެ ދަޝްރަތު ރަންގްސަލާ ސްޓޭޑިއަމްގަ އެވެ.
ދެ ގްރޫޕަކަށް ބަހާލައިގެން ބާއްވާ މުބާރާތުގެ ގުރޫޕް އޭގައި ތިން ޓީމު ހިމެނޭ އެއީ ބަންގްލަދޭޝް އާއި އިންޑިއާ އަދި ޕާކިސްތާނެވެ. ގުރޫޕް ބީގައި ހިމެނެނީ ނޭޕާލާއި، ސްރީ ލަންކާ އާއި، ބޫޓާން އަދި ރާއްޖެ އެވެ.
މި މުބާރާތް ހުޅުވާ މެޗުގައި ރާއްޖެ އިން އަވައްޓެރި ލަންކާއާ ދެކޮޅަށް ކުޅޭނީ މި މަހުގެ 18 ގަ އެވެ.