ކުރިން އަންނަ މަހު ރިލީޒްކުރަން ދަރުމާ ޕްރޮޑަކްޝަންގެ "ދަޅަކް 2" އަންނަ އަހަރަށް ފަސްކޮށްފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން މިއަދު ބުނީ ކުރިން އަންނަ މަހުގެ 22 ގައި ސިނަމާތަކަށް ގެންނަން ތާވަލުކުރި ފިލްމު، މިހާރު ބެލުންތެރިންނަށް ގެނެސްދޭން ނިންމާފައި ވަނީ އަންނަ އަހަރުގެ ފެބްރުއަރީ 21 ގައި ކަމަށެވެ. ނަމަވެސް މިކަން އަދި ދަރުމާ އިން ރަސްމީކޮށް ހާމައެއް ނުކުރެ އެވެ.
ޓްރިޕްތީ ދިމްރި އާއި ސިދާންތު ޗަތުރަވެދީ ލީޑް ރޯލު ކުޅެފައިވާ "ދަޅަކް 2" ނޮވެމްބަރުގައި ގެނެސްދޭނެކަން ދަރުމާ އިން އިއުލާންކުރީ މިދިޔަ މެއި މަހުގެ 27 ގަ އެވެ. ފާހަގަކޮށްލެވޭ ކަމަކީ ފިލްމު އަންނަ އަހަރަށް ފަސްކުރި އިރު، ޓްރިޕްތީގެ "ބޫލް ބުލައްޔާ 3" އަންނަ މަހުގެ 1 ގައި ރިލީޒްކުރަން ހަމަޖެހިފައިވާކަމެވެ.
ކާތިކް އާރިއަން ބަތަލުގެ ރޯލު ކުޅެފައިވާ އަދި އަނީސް ބަޒްމީ ޑައިރެކްޓްކޮށްފައިވާ މި ހޮރޯ-ކޮމެޑީ އަކީ މި އަހަރުގެ އެންމެ އުންމީދީ އެއް ފިލްމެވެ. "ބޫލް ބުލައްޔާ 3" ގެ ކާސްޓްގައި ވިދިއާ ބާލަން އާއި މަދޫރީ ޑިކްސިޓް ވެސް ހިމެނެ އެވެ.
ޓްރިޕްތީގެ އެންމެ ފަހުގެ ފިލްމަކީ މިދިޔަ ހުކުރު ދުވަހު ރިލީޒްކުރި "ވިކީ ވިދިއާ ކާ ވޯ ވާލާ ވީޑިއޯ" އެވެ. އޭނަގެ މި އަހަރުގެ ފުރަތަމަ ފިލްމަކީ ދަރުމާ އިން ޖުލައިގައި ގެނެސްދިން ކާމިޔާބު ރޮމޭންޓިކް ކޮމެޑީ "ބޭޑް ނިއުސް" އެވެ.
އަސަރު ގަދަ ލޯބީގެ ވާހަކައެއް ކިޔައި ދޭނެ "ދަޅަކް 2" އަކީ އާ ޑައިރެކްޓަރު ޝާޒިއާ އިބްގާލްގެ ޑައިރެކްޝަނެކެވެ. މި ފިލްމަކީ ދަރުމާ އިން 2018 ގައި ގެނެސްދިން "ދަޅަކް" އާ ގުޅުވައިގެން ގެނެސްދޭ ފިލްމަކަށް ވިޔަސް ކުރީގެ ފިލްމުގެ ވާހަކަ އާއި ކާސްޓާ، އާ ފިލްމާ އެއްވެސް ގުޅުމެއް ނެތެވެ.
ޝިޝާންކް ކައިތާން ގެނެސްދިން "ދަޅަކް" އަކީ ޖާންވީ ކަޕޫރާއި އިޝާން ޚައްތަރު ބޮލީވުޑަށް ތައާރަފުވި ފިލްމެވެ.