ބޮލީވުޑްގެ ތަރިން ކަމަށްވާ ސިދާތު މަލްއުތުރާ އާއި ޖާންވީ ކަޕޫރް އެކީގައި ކުޅޭ ފުރަތަމަ ފިލްމުގެ ނަމަކީ "ޕަރަމް ސުންދަރީ" ކަމަށް ރިޕޯޓްތައް ބުނެފި އެވެ.
މި ފިލްމަކީ ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އަށް ތުޝާރު ޖަލޯޓާ ޑައިރެކްޓްކުރަން ހަމަޖެހިފައިވާ ރޮމޭންޓިކް ކޮމެޑީއެކެވެ. އޭނަ އަކީ އަބީޝެކް ބައްޗަންގެ 2022 ގެ "ދާސްވީ" ގެނެސްދިން ޑައިރެކްޓަރެވެ.
ސިދާތާއި ޖާންވީގެ ފިލްމުގެ ޓައިޓްލް ނަގާފައި ވަނީ މެޑޮކް އިން 2021 ގައި ކްރިތީ ސެނަންއާ އެކީ ގެނެސްދިން މަގުބޫލު ފިލްމު "މިމީ" ގެ ލަވައަކުންނެވެ. ކްރިތީ އަށް ނެޝަނަލް އެވޯޑް ލިބުނު ފިލްމުގައި އޭނަގެ ފަރި ނެށުންތަކެއް ފެނިގެންދާ ލަވައެއް "ޕަރަމް ސުންދަރީ" ގެ ނަމުގައި ހިމަނާފައިވެ އެވެ.
ޕީޕިންމޫން އިން ބުނީ މި ފިލްމަކީ ސިނަމާތަކަށް ގެނައުމުގެ ބަދަލުގައި ސްޓްރީމިން ޕްލެޓްފޯމަކަށް ހަދަމް ހަމަޖެހިފައިވާ ފިލްމުގެ ޝޫޓިން އަންނަ މަހުގެ ފަހުކޮޅު ނުވަތަ ޑިސެމްބަރު މަހުގެ ތެރޭގައި ފަށާނެ ކަމަށެވެ.
ޖާންވީގެ އެންމެ ފަހުގެ ފިލްމަކީ މިދިޔަ މަހުގެ 27 ގައި ރިލީޒްކުރި އެންޓީއާރް ޖޫނިއާގެ "ދޭވްރާ: ޕާޓް 1" އެވެ. ބަތަލާ ކިއާރާ އަދުވާނީގެ ފިރިމީހާ ސިދާތުގެ އެންމެ ފަހުގެ ފިލްމަކީ މާޗްގައި ގެނެސްދިން "ޔޯދާ" އެވެ.