ރާއްޖޭގެ އިމާމުންނަށް ކުވައިތުން އަރަބި ބަސް ކިޔަވަން ފުރުސަތު ލިބިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި މިނިސްޓަރު ވިދާޅުވީ މިއީ ކުވައިތުގައި ޢަރަބި ބަސް ކިޔަވަން ލިބުނު ކުރު ކޯސްތަކެއްގެ ފުރުސަތު ކަމަށެވެ.
"ތިން މަސް ދުވަހުގެ ކުރު ކޯސްގެ ފުރުޞަތު ވަނީ ލިބިފައި،" ޝަހީމު ވިދާޅުވި އެވެ. "އަހަރަކު މި ކޯސް ދެ ފަހަރު ކުވައިތުގައި އޮންނާނެ."
އޭނަ ވިދާޅުވީ މިއީ ކުވައިތުގެ އިސްލާމިކް މިނިސްޓްރީއާ ގުޅިގެން ކުރިއަށް ގެންދެވޭ ޕްރޮގްރާމެއް ކަމަށެވެ.
ނަމަވެސް ޕްރޮގްރާމްގެ ފުރަތަމަ ބުރަށް އިމާމުންތަކެއް އަރަބި ބަސް ކިޔަވަން ފޮނުވާނެ އިރަކާއި އެކަމާ ގުޅޭ ގޮތުން ފުރުސަތު ފަހިކޮށް ދޭނެ ގޮތެއް މިނިސްޓަރު ހާމަކޮށްފައެއް ނުވެ އެވެ.
މިދިޔަ އަހަރުގެ ނޮވެމްބަރު 5 އިން މި އަހަރުގެ މާޗް 7 އަށް މާލޭގައި އިމާމުންނަށް އަރަބި ބަސް ދަސްކޮށް ދިނުމުގެ ޕްރޮގްރާމެއް ހިންގާފއިވެ އެވެ. ޖުމްލަ 20 އިމާމަކު ފުރިހަމަކުރި އެ ޕްރޮގްރާމަކީ އިސްލާމިކް މިނިސްޓްޓްރީ އާއި ރާއްޖޭގައި ހުންނަ މިސްރު އެމްބަސީ ގުޅިގެން ކުރިއަށް ގެންދިޔަ ކްލާހެކެވެ.
އެ ޕްރޮގްރާމް ކިޔަވައި ދެއްވީ މިސްރުގެ އަޒްހަރު ޔުނިވާސިޓީގެ މުދައްރިސުންނެވެ.
އިސްލާމިކް މިނިސްޓްރީން އަންނަނީ ރާއްޖޭގެ އިމާމުންގެ ފެންވަރުގެ ރަނގަޅުކުރުމަށްޓަކައި ބޭރުގެ އެކި ގައުމުތަކަށް ފޮނުވައިގެން ތަމްރީނާ ތަޖުރިބާގެ ކުރި ދަތުރުތަކެއްގެ ފުރުސަތު ފަހިކޮށް ދެމުންނެވެ. އެގޮތުން މި އަހަރުގެ ތެރޭގައި އިމާމުންތަކެއް ސައުދީ އަރަބިއްޔާއަށާއި ބުރުނާއީ އަސް ފޮނުވާފައުވެ އެވެ.