ރާއްޖޭގައި ވޭޕް މަނާކުރަން ސަރުކާރުން ނިންމުމާ ގުޅިގެން އެ ނިންމުން ތަންފީޒުކުރުމަށްޓަކައި ކަސްޓަމްސް އިން ހަމަޖައްސަން ޖެހޭ އިންތިޒާމްތައް ހަމަޖެއްސުމާއި ވާން ޖެހޭ ތައްޔާރީތައްވުމުގެ ކަންކަން ކުރިޔަށް ގެންދާނެ ކަމަށް އެތަމުން ބުނެފި އެވެ.
ކަސްޓްސް އިން އެގޮތަށް ބުނީ ވޭޕް މަނާކުރަން ނިންމިކަން ރައީސް ޑރ. މުހައްމަދު އިއްޔެ ސޯޝަލް މީޑިއާ މެދުވެރިކޮށް އިއުލާން ކުރެއްވުމާ ގުޅިގެންނެވެ.
ވޭޕްކުރުމުގެ މައްސަލަ ރާއްޖޭގައި ބޮޑުވަމުންދާތީ އާއި އޭގެ ސަބަބުން ގިނަ މައްސަލަތަކެއް ވެސް ކުރިމަތިވަމުންދާތީ ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެ އަށް އެތެރުކުރުން އަންނަ މަހުގެ 15 އިން ފެށިގެން މަނާކުރުމަށް ނިންމާފައިވާ ކަމަށެވެ.
އަދި ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ މަހުގެ 15 އިން ފެށިގެން މަނާކުރުމަށް ކުރަން ޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގާފައިވާ ކަމަށް ރައީސް ވިދާޅުވި އެވެ.
ރައީސް މިގޮތަށް ނިންމެވީ ވޭޕް މަނާކޮށް ދޭން އެކިއެކި ފަރާތްތަކުން ގޮވާލާފައި ވަނިކޮށެވެ. އަދި އެ ނިންމުމާ ގުޅިގެން ވަރަށް ގިނަ ފަރާތްތަކުން ނިންމުމަށް މަރުހަބާ ކިޔާފައިވެ އެވެ.
ވޭޕް މަނާކުރަން ނިންމުމާ ގުޅިގެން އެޓާނީ ޖެނެރަލް އަހުމަދު އުޝާމް ވިދާޅުވީ އެ ނިންމުން ތަންފީޒުކުރުމަށްޓަކައި ދުންފަތާއި އިމްޕޯޓް/އެކްސްޕޯޓް ގާނޫނަށް ގެންނަ އިސްލާހުތައް މި ހަފުތާތެރޭ ރައްޔިތުންގެ މަޖިލީހަށް ފޮނުވާނެ ކަމަށެވެ.