ރާއްޖޭގައި ވޭޕް މަނާކުރަން ނިންމުމާ ގުޅިގެން ކުރީގެ ހެލްތު މިނިސްޓަރު އަހުމަދު ނަސީމު ވެސް އެ ނިންމުމަށް ތާއީދު ކުރައްވައިފި އެވެ.
އަންނަ މަހުން ފެށިގެން ރާއްޖޭގައި ވޭޕްގެ މުއާމަލާތް ހިންގުން މަނާކުރަން ސަރުކާރުން ނިންމިކަން އިއްޔެ ރައީސް ޑރ. މުހައްމަދު މުއިއްޒު އިއުލާން ކުރެއްވުމާ ގުޅިގެން މިދިޔަ ސަރުކާރުގައި ހެލްތު މިނިސްޓަރުކަން ވެސް ކުރެއްވި ނަސީމު ވިދާޅުވީ އެއީ ވަރަށް ރަނގަޅު ނިންމުމެއް ކަމަށެވެ.
ވޭޕްކުރުމުގެ މައްސަލަ ރާއްޖޭގައި ބޮޑުވަމުންދާތީ އާއި އޭގެ ސަބަބުން ގިނަ މައްސަލަތަކެއް ވެސް ކުރިމަތިވަމުންދާތީ ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެ އަށް އެތެރުކުރުން އަންނަ މަހުގެ 15 އިން ފެށިގެން މަނާކުރުމަށް ނިންމާފައިވާ ކަމަށެވެ.
An excellent decision https://t.co/7TH4PP24YQ
— Ahmed Naseem (@KerafaNaseem) October 14, 2024
އަދި ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ މަހުގެ 15 އިން ފެށިގެން މަނާކުރުމަށް ކުރަން ޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގާފައިވާ ކަމަށް ރައީސް ވިދާޅުވި އެވެ.
ރައީސް މިގޮތަށް ނިންމެވީ ވޭޕް މަނާކޮށް ދޭން އެކިއެކި ފަރާތްތަކުން ގޮވާލާފައި ވަނިކޮށެވެ. އަދި އެ ނިންމުމާ ގުޅިގެން ވަރަށް ގިނަ ފަރާތްތަކުން ނިންމުމަށް މަރުހަބާ ކިޔާފައިވެ އެވެ.
ވޭޕް މަނާކުރަން ނިންމުމާ ގުޅިގެން އެޓާނީ ޖެނެރަލް އަހުމަދު އުޝާމް ވިދާޅުވީ އެ ނިންމުން ތަންފީޒުކުރުމަށްޓަކައި ދުންފަތާއި އިމްޕޯޓް/އެކްސްޕޯޓް ގާނޫނަށް ގެންނަ އިސްލާހުތައް މި ހަފުތާގެ ތެރޭގައި ރައްޔިތުންގެ މަޖިލީހަށް ފޮނުވާނެ ކަމަށެވެ.
ސަރުކާރުން މިއަދު ވަނީ ސިނގިރެޓާއި ބިޑިން ނަގާ ޑިއުޓީ ވެސް އަންނަ މަހުގެ 15 އިން ފެށިގެން ބޮޑު ކުރަން ނިންމައިފަ އެވެ.