އިންޑިއާގެ މަޝްހޫރު ފިލްމީ ތަރި، ޝާހްރުކް ޚާންގެ އެކްޓިންގެ ފެށުމަށް ކަމަށްވާ ޓީވީ ސިލްސިލާ "ފައުޖީ" ގެ ދެވަނަ ބައެއް ގެނެސްދޭން ނިންމައި އެކަން މިއަދު އިއުލާންކޮށްފި އެވެ.
ދޫރްދަރުޝަން އިން 1989 ގައި 13 އެޕިސޯޑަށް ގެނެސްދިން މަގުބޫލު އެ ސިލްސިލާ ގެ ދެވަނަ ބައި "ފައުޖީ 2" މުޅިން ތަފާތު ކާސްޓަކާ އެކީ އަލުން ދޫރްދަޝަނަށް ގެނެސްދޭން ނިންމީ ޕްރޮޑިއުސަރު ސަންދީޕް ސިންގް އެވެ. ލީޑް ކާސްޓްގައި ވިކީ ޖެއިން އާއި ގޯހަރް ޚާން ހިމަނައިގެން ހަދަން ނިންމާފައިވާ "ފައުޖީ 2" ގައި 12 އާ ފަންނާނަކު ވެސް ހިމެނޭނެ އެވެ.
ސޯނޫ ނިގާމް ޓައިޓްލް ލަވަ ކިޔައި ދީފައިވާ އަދި ޖުމްލަ 11 ލަވަ ހިމެނޭ މި ވަތަނީ ސިލްސިލާ ޑައިރެކްޓް ކުރާނީ އަބިނާވް ޕަރީކް އެވެ.
ނަމަވެސް "ފައުޖީ 2" ބެލުންތެރިންނަށް ގެނެސްދޭނެ އިރެއް އަދި އިއުލާނެއް ނުކުރެ އެވެ.
ކާސްޓްގައި ޝާހްރުކާ އެކު ރާކޭޝް ޝަރުމާ އާއި އަމީނާ ޝެރްވާނީ އާއި ވިޝްވަޖީތު ޕްރަދާން އާއި ސަންޖޭ ތަނޭޖާ އާއި ވިކްރަމް ޗޯޕްޅާ އަދި ޖޭޝްރީ އަރޯރާ ފަދަ ފަންނާނުން ހިމެނޭ "ފައުޖީ" ޑައިރެކްޓްކުރީ ލެފްޓިނަންޓް ކާނަލް ރާޖް ކުމާރު ކަޕޫރެވެ.
މި ސިލްސިލާ އިން ޝާހްރުކް ފެށި އެކްޓިން ދަތުރާ އެކީ އޭނަގެ ފުރަތަމަ ފިލްމަކީ 1992 ގެ "ދީވާނާ" އެވެ. އޭގެ ފަހުން މިހާތަނަށް 58 އަހަރުގެ އެކްޓަރު ކާމިޔާބު އެތައް ފިލްމެއް ކުޅެ، ސުޕަސްޓާރެއްގެ ދަރަޖަ ހޯދާފައިވެ އެވެ. އަދި ޝާހްރުކް ސިފަކުރަނީ "ކިންގް އޮފް ބޮލީވުޑް" ގެ ގޮތުގަ އެވެ.
އޭނަގެ އެންމެ ފަހުގެ ފިލްމަކީ މިދިޔަ އަހަރުގެ "ޑަންކީ" އެވެ. މިދިޔަ އަހަރު ޝާހްރުކްގެ ތިން ފިލްމެއް ރިލީޒްވި އެވެ. އެއީ "ޑަންކީ" ގެ އިތުރުން "ޕަތާން" އާއި "ޖަވާން" އެވެ.
"ފައުޖީ" ގެ އިތުރުން ވެސް ޝާހްރުކް ކެރިއަރުގެ އެންމެ ކުރީކޮޅު ސިލްސިލާތަކެއް ކުޅުނެވެ. އޭގެ ތެރޭގައި "ދިލް ދަރިއާ" އާއި "ސާކަސް" ފާހަގަކޮށްލެވެ އެވެ.