ދިވެހި ބޭސްވެރިކަމުގެ ކޯސްތައް އަންނަ އަހަރު ފަށަން ތައްޔާރުވަމުން އަންނަ ކަމަށް މޯލްޑިވްސް ޕޮލިޓެކްނިކުން ބުނެފި އެވެ.
ޕޮލިޓެކްނިކްގެ ސީއީއޯ ޒޫޝާން ކަމާލުއްދީން ގއ. ވިލިގިއްޔަށް ކުރެއްވި ދަތުރަކަށް ފަހު ވިދާޅުވީ ވިލިނގިލީ ކައުންސިލާއި އެ ރަށުގެ އެކި ބޭފުޅުންގެ ފަރާތުން ދިވެހި ބޭސްވެރިކަމުގެ ދާއިރާއިން ތަމްރީނުވުމުގެ ފުރުސަތުތައް ފަހިކޮށް ދިނުމަށް އެދިފައިވާ ކަމަށެވެ.
އެހެންވެ ދިވެހި ބޭސްވެރިކަމަކީ ނެތެމުންދާ ފަންނުތަެއް ދިރުވައި އާލާކުރުމަކީ ޕޮލިޓެކްނިކްގެ މައިގަނޑު މަގުސަދުތަކުގެ ތެރޭގައި ހިމެނޭކަމެއްކަން ފާހަގަ ކުރައްވައި ވިދާޅުވީ އަމާޒަކީ އަންނަ އަހަރު އެފަދަ ކޯސްތަކެއް ފެށޭ ވަރުކުރުން ކަމަށެވެ.
"ޕޮލިޓެކްނިކް އިން ވަނީ އެމްއެންއެސްޑީއޭ އަދި ހަޔަ އެޑިއުކޭޝަން މިނިސްޓްރީގެ އެއްބާރުލުމާއެކު މުޅިން އައު ފަސް ކޯހެއް ތަޢާރަފްކުރުމަށް ކަނޑައަޅާފައި،" ޒޫޝާން ވިދާޅުވި އެވެ. "އެގޮތުން، ޕޮލިޓެކްނިކުން މި އަންނަނީ އަންނަ އަހަރު ތެރޭގައި، ޕޮލިޓެކްނިކްގެ ވިލިނގިލި ކެމްޕަސްގައި، ދިވެހި ބޭސްވެރިކަމާ ގުޅޭ ޤައުމީ ފެންވަރުގެ ކޯހެއް ތަޢާރަފުކުރުމުގެ މަސައްކަތްތަށް ފަށުމަށް ތައްޔާރުވަމުން."
ދިވެހި ބޭސްވެރިކަމަކީ ކުރިން ދިވެހިންގެ ތެރޭގައި ވަރަށް ބޮޑަށް ފަންނެކެވެ. ނަމަވެސް ޒަމާނީ ބޭސްވެރިކަމާ އެކީ ދިވެހި ބޭސްވެރިކަމަށް އޮތް ޑިމާންޑަށް ބޮޑު ބަދަލެއް އައިސްފައިވެ އެވެ.