ރާއްޖޭގެ ދެކުނުގެ ސަރަހައްދުގެ ޓޫރިޒަމް ކުރިއެރުވުމަށްޓަކައި ސަދަން މޯލްޑިވްސް ޓޫރިޒަމް އެސޯސިއޭޝަން (އެސްއެމްޓީއޭ) ގެ ނަމުގައި ޖަމިއްޔާއެއް އުފައްދައިފި އެވެ.
މީގެ މައިގަނޑު މަގުސަދަކީ ދެކުނުގެ އަތޮޅުތަކުގެ ޓޫރިޒަމް ވަކި މަންޒިލެއްގެ ގޮތުގައި ޕްރޮމޯޓްކުރުމެވެ. އެސްއެމްޓީއޭގެ މަގުސަދުތަކުގެ ތެރޭގައި ޓޫރިޒަން ތަރައްގީ ކުރުމަށް ކައުންސިލްތަކާއި ސަރުކާރުގެ މުއައްސަސާތަކާ ގުޅިގެން މަސައްކަތްކުރުމާއި ސަގާފީ އަދި ގުދުރަތީ ތަރިކައިގެ ތަންތަން ޕްރޮމޯޓް ކުރުމާއި އެމި ސަރަހައްދަށް ޒިޔާރަތްކުރާ ޓޫރިސްޓުންގެ އަދަދު އިތުރުކުރުން ހިމެނެ އެވެ.
އެގޮތުން މައިގަނޑު މާކެޓިން ކެމްޕޭންތައް ހިންގައި، ދެކުނުގެ ސަރަހައްދަށް ބޭރުގެ އެއާލައިންތަކުގެ ސީދާ ދަތުރުތައް ފެށުމަށް މަސައްކަތްތަކެއްކޮށް ދިނުމަށް ގޮވާލަން ޖަމިއްޔާ އިން ބާރު އަޅާނެ އެވެ.
އެސްއެމްޓީއޭ އިން ބުނީ ސަރުކާރުގެ އިދާރާތަކާ ގުޅިގެން ކަނޑާއި ވައިގެ ދަތުރުފަތުރުގެ ފުރިހަމަ ނިޒާމެއް ގާއިމުކޮށްގެން ރަށްތަކުގެ މެދުގައި ގުޅުން އިތުރުކުރުމަށް މަސައްކަތްތަކެއް ކުރާނެ ކަމަށެވެ. އަދި ވެށި ހިމާޔަތް ކުރުމަށާއި ޓޫރިޒަމްގެ ވިޔަފާރިތަކުގައި ތިމާވެއްޓާ ރައްޓެހި އާދަތައް ކުރިއެރުވުމަށް ވެސް އިސްކަން ދޭނެ އެވެ.
ރާއްޖޭގެ އެންމެ ދެކުނުން އައްޑޫ ޓޫރިސްޓް މަންޒިލެއްގެ ގޮތުގައި ބްރޭންޑް ކުރަން ކައުންސިލުން މަސައްކަތްތަކެއް ކުރަމުން އަންނަކަން ފާހަގަކޮށްލެވެ އެވެ. އެގޮތުން ބްރޭންޑް ލޯންޗްކުރަން ވެސް ހަމަޖެހިފައިވެ އެވެ.