ވެލާނާ އިންޓަނޭޝަނަލް އެއާޕޯޓުގައި ލަގޭޖް އުފުލާ ވެހިކަލެއް ދުއްވާފައި ދިޔަ ދިވެއްސަކު މިއަދު ކުއްލި ގޮތަކަށް މަރުވެއްޖެ އެވެ.
ފުލުހުން މިއަދު މީޑިއާތަކަށް ބުނީ އެއާޕޯޓު ލަގެޖު އުފުލާ ވެހިކަލެއް ދުއްވާފައި ދަނިކޮށް ލައިޓާއި ކެމެރާ ހަރުކޮށްފައި ހުރި ސްޓްރަކްޗާގެ ބުޑުގަނޑުގައި ޖެހިފައިވާ ކަމަށެވެ. އަދި އެ ސްޓްރަކްޗާ ހުރީ އޭޕްރަން ސަރަހައްދުގައި ކަމަށް ފުލުހުން ބުންޏެވެ.
އެ ހާދިސާ ހިނގުމާ އެކު ވެހިކަލް ދުއްވަން އިން މީހާ އެއާޕޯޓުގެ ކްލިނިކަށް ގެންދިޔަ ކަމަށާއި އޭގެ ފަހުން އޭނާ އައިޖީއެމްއެޗަށް ވެސް ގެންދިޔަ ކަމަށް ވެސް ފުލުހުން ބުންޏެވެ. އަދި ކްލިނިކަށް ގެންދިޔަ އިރު ވެސް އެ މީހާ މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.
މަރުވި މުވައްޒަފަކީ ގދ. މަޑަވެލި އަތަމާގޭ އަސްލަމް އާދަމް، 45، އެވެ.
ފުލުހުން ބުނީ އައިޖީއެމްއެޗަށް ގެންގޮސް އިތުރަށް ބެލި އިރު ވެސް އޭނަގެ ހަށިގަނޑުގެ ބޭރުފުށުން އެއްވެސް އަނިޔާއެއް ފެންނަން ނެތް ކަމަށެވެ.
މި ހާދިސާއާ ގުޅިގެން އިތުރަށް ބަލަން ޖެހޭ ކަންކަން ފުލުހުން އަންނަނީ ބަލަމުންނެވެ.