ދަނޑުވެރިންނަށް ބޭނުންވާ މުހިންމު ގިނަ މައުލޫމާތުތަކެއް ފަސޭހަކޮށް ލިބޭނެ ގޮތް ފަރުމާކޮށްފައިވާ "ދަނޑުވެރިޔާ" އެޕްގެ މޮބައިލް ވާޝަން މިއަދު ލޯންޗްކޮށްފި އެވެ.
އެ އެޕް ލޯންޗްކުރީ މިއަދު ފާހަގަ ކުރަމުން އަންނަ ރާއްޖޭގެ ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުރަން ބޭއްވި ޕެނެލް ޑިސްކަޝަންގައި ގައުމީ ޔުނިވަސިޓީގެ ޗާންސެލަރި ޑރ. މަހްމޫދު ޝައުގީ އެވެ.
"ދަނޑުވެރިޔާ" އެޕަކީ މިދިޔަ އަހަރު ލޯންޗްކުރި އެޕެކެވެ. އެކަމަކު އެ ފަހަރު ލޯންޗްކުރީ އޭގެ ވެބް އެޕެވެ. މިއަދު ލޯންޗްކުރީ އޭގެ މޮބައިލް އެޕެވެ.
އަދިވެސް އިތުރަށް ޑިވެލޮޕް ކުރުމުގެ މަރުހަކާގައި އޮތް މި އެޕްގެ މަސައްކަތްތައް ކުރިއަށް ގެންދަނީ އިފާޑުގެ އެހީގައި ކުރިއަށް ގެންދާ މޯލްޑިވްސް އެގްރި ބިޒްނަސް ޕްރޮގްރާމުގެ ދަށުންނެވެ. އެޕްގެ މަސައްކަތް އެއްކޮށް ނިންމަން ޖެހެނީ އަންނަ އަހަރުގެ ޖެނުއަރީއަށެެވެ.
"ދަނޑުވެރިޔާ" އެޕުން ލިބޭ ހިދުމަތްތަކުގެ ތެރޭގައި ދަނޑުވެރިކަން ކުރުމަށް ބޭނުންވާ ފަންނީ މައުލޫމާތު ފޯރުކޮށް ދިނުމާއި ކްރޮޕް ޕްލޭނާއި ދަނޑުވެރިކަމުގެ އެކި މައްސަލަތަކުގައި ފަންނީ މަޝްވަރާތައް ކުރުމަށާއި، ހައްލުތައް ހޯދުމަށް ކޮމިއުނިޓީ ފޯރަމާއި ދަނޑުވެރިކަމުގެ އުފެއްދުންތައް ވިއްކުމަށް، ދަނޑުވެރިންނާއި ގަންނަ ފަރާތްތައް ގުޅުވާލަދިނުމަށް މާކެޓު ޕްލެޓު ފޯމެއް ފަހިކޮށް ދިނުމުގެ އިތުރަށް ބާޒާރުގައި ދަނޑުވެރިކަމުގެ އުފެއްދުންތަކުގެ އަގުތަކަށް އަންނަ ބަދަލުތައް ހިމެނެ އެވެ.
އެޕްގެ ފޯރަމާއި ދަނޑުވެރި ބާޒާރުގެ ޚިދުމަތް ލިބޭނީ އީފާސް މެދުވެރިކޮށް ލޮގިންވެގެންނެވެ.