ބޮލީވުޑްގެ އެކްޓަރު ވަރޫން ދަވަން އާއި ދެކުނުގެ މަޝްހޫރު ބަތަލާ ސަމަންތާ ރޫތު ޕްރަބޫގެ ވެބް ސީރީޒް "ސިޓަޑެލް: ހަނީ ބަނީ" ގެ ޓްރެއިލާ ދައްކާލައިފި އެވެ.
އެމެޒޯން ޕްރައިމް ވީޑިއޯ އިން އަންނަ މަހުގެ 7 ގައި ޕްރީމިއާ ކުރަން ހަމަޖެހިފައިވާ މި ސީރީޒަކީ "އެވެންޖާސް އެންޑްގޭމް" ގެ ޑައިރެކްޓަރުން ކަމަށްވާ އެންތަނީ އާއި ޖޯ ރުސޯ މިދިޔަ އަހަރު، ޕްރިޔަންކާ ޗޯޕްޅާ އާއި ރިޗަޑް މެޑެން ހިމަނައިގެން އެމެޒޯން ޕްރައިމަށް ގެނައި ސީރީޒް "ސިޓަޑެލް" އާ ގުޅުވައިގެން ހަދާފައިވާ ސީރީޒެކެވެ.
"ސިޓަޑެލް: ހަނީ ބަނީ" ޑައިރެކްޓްކުރީ "ފެމިލީ މޭން" ފަދަ ކާމިޔާބު ސީރީޒްތައް ގެނެސްދީފައިވާ ރާޖް އެންޑް ޑީކޭ އެވެ. މީގެ އިތުރު ކާސްޓުންގެ ތެރޭގައި ސާގިގް ސަލީމް، ކޭކޭ މެނަން، ސިކަންދަރު ކޭރް އަދު ސިމްރަން ބައްގާ ހިމެނެ އެވެ.
ވަރޫންގެ ފުރަތަމަ ވެބް ސީރީޒްގެ ޓްރެއިލާ މިއަދު ދައްކައިލި އިރު، އޭނަގެ ކުރިއަށް އޮތް ފިލްމަކީ ޑިސެމްބަރު 25 އަށް ތާވަލުކޮށްފައި އޮތް އެކްޝަން ޑްރާމާ "ބޭބީ ޖޯން" އެވެ.