މިއަހަރު ފެބްރުއަރީ މަހު ހުޅުމާލޭ އުތުރު ފަރާތު ފަރަށް އެރި ޓަގުބޯޓާއި ހިލަ ބާޖު އޮޕަރޭޓް ކުރަމުން ދިޔަ ފަރާތް 29 މިލިއަން އިން ޖޫރިމަނާކޮށްފި އެވެ.
އެންވަޔަރްމަންޓް ޕްރޮޓެކްޝަން އޭޖެންސީ (އީޕީއޭ) އިން މިއަދު ކުރި އިއުލާނެއްގައި ބުނީ ޓަގު "އަނަންދި" އާއި ބާޖު "އޭއެމް މަނުމިތު" ހުޅުމާލެ ފަރަށް އަރާފައިވަނީ ފެބްރުއަރީ 21 ގައި ކަމަށާއި އެ އުޅަނދުތައް ފަރުމަތިން ނަގާފައިވަނީ އޭޕްރީލް 23 ގައި ކަމަށެވެ.
ފަރަށް ލިބުނު ގެއްލުންތައް ބެލުމުގެ ގޮތުން މި އުޅަނދުތަކުގެ ވެރިފަރާތުން އައްޔަންކޮށްފައިވާ ސަރވެޔަރުންނާއެކު ޖޮއިންޓް ސަރވޭއެއް ކުރިއަށް ގެންގޮސްފައިވާއިރު، މި ސަރވޭއިން ދައްކާގޮތުގައި އެ ސަރަޙައްދުގެ 1159 އަކަ މީޓަރަށް ބޮޑެތި ގެއްލުންތަކެއް ވެފައިވާ ކަމަށް އީޕީއޭ އިން ބުނެ އެވެ.
ހުޅުމާލޭގެ އުތުރުފަރާތު ފަރުގެ މާހައުލަށް ލިބުނު ގެއްލުންތަކަށް ކަނޑައެޅުނު ޖޫރިމަނާގެ ޢަދަދަކީ 29,201,946ރ. ކަމަށާއި މި ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް އެ އެ އުޅަނދުތަކުގެ އޮޕަރޭޓަރ ކަމަށްވާ ދި މިޑްލް އީސްޓް މެރިން އެލްއެލްސީއަށް އަންގާފައިވާނެ ކަމަށް އީޕީއޭ އިން ބުނެ އެވެ.