ޓީޖީއެސްޓީ ބޮޑު ކުރަން ރަައްޔިތުންގެ މަޖިލީހަށް ހުށަހެޅި ބިލުގެ ބަހުސް ނިންމައި، ކޮމިޓީ އަށް މިއަދު ފޮނުވައިފި އެވެ.
މަޖިލީހުގެ އިއްޔެގެ ޖަލްސާއަށް ސަރުކާރުގެ ފަރާތުން މި ބިލު ހުށަހެޅުއްވީ މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ އިބްރާހީމް އެވެ. މި ބިލުގެ ބަހުސް ފެށީ މިއަދު ކަމަށްވާއިރު، ބިލަށް ބަހުސް ކުރެއްވީ މަދު މެމްބަރުންތަކެކެވެ.
ބިލު ބަލައިގަތުމަށް ވޯޓަށް އެހުމުން 52 މެންބަރުން އެއަށް ތާއީދު ކުރެއްވިއިރު ދެކޮޅަށް ވޯޓު ދެއްވީ ހަތް މެންބަރުންނެވެ. މި ބިލު ދިރާސާކުރަން ފޮނުވާފައިވަނީ މުޅި މަޖިލީހުގެ ކޮމިޓީއަކަށެވެ.
މި ބިލުގައިވާ ގޮތުން މިހާރު ޓީޖީއެސްޓީގެ ގޮތުގައި ނަގަމުން އަންނަ 16 ޕަސެންޓް އަންނަ އަހަރުގެ ޖޫން މަހުން ފެށިގެން 17 ޕަސެންޓަށް ބޮޑުވާނެ އެވެ. އެއާ އެކު އަންނަ އަހަރު މި ޓެކްސް އިން ދައުލަތަށް އިތުރަށް 200 މިލިއަން ޑޮލަރު ލިބޭނެ ކަމަށް ވަނީ ލަފާކޮށްފަ އެވެ.