ދަނޑުވެރިކަން ކުރިއެރުވުމަށް މިހާތަނަށް 16 މިލިއަން ރުފިޔާގެ ލޯނު ދަނޑުވެރިންނަށް ދޫކޮށްފައިވާ ކަމަށް އެގްރިކަލްޗަ މިނިސްޓަރު ޑރ. އައިޝަތު ރަމީލާ ވިދާޅުވެއްޖެ އެވެ.
މިއަދު ފާހަގަކުރާ ރާއްޖޭގެ ދުނިޔޭގެ ކާބޯތަކެތީގެ ދުވަހާ ގުޅިގެން ދެއްވި ޚިތާބެއްގައި މިނިސްޓަރު ވިދާޅުވީ، ދަނޑުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ބޭނުންވާ ފައިސާ ފަސޭހަކަމާ އެކު ލިބޭނެ މަގު ފަހިކުރުމަށް ޓަކައި "ދަނޑުވެރި ނަފާ"ގެ ނަމުގައި ދަނޑުވެރިކަމުގެ ސިނާއަތުގައި މަސައްކަތްކުރާ ހުރިހާ ފަރާތްތަކަށް ހުޅުވާލާފައިވާ ލޯނު ޕްރޮގްރާމެއް އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އާ ގުޅިގެން މިނިސްޓްރީން ހިންގަމުން އަންނަ ކަމަށެވެ.
އަދި މި ލޯނި ސްކީމްގެ 30 ޕަސަންޓު ހިއްސާކޮށްފައި ވާނީ ދަނޑުވެރިކަމުގެ މާހައުލުގައި މަސައްކަތްކުރާ އަންހެނުންނަށް ކަމަށް ވިދާޅުވި އެވެ.
"މި ލޯނު ޕްރޮގްރާމުގެ ދަށުން ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަން، އާބަން އެގްރިކަލްޗާ، ޕްރޮޓެކްޓެޑް އެގަރިކަލްޗާ، ވާޓިކަލް އެގްރިކަލްޗާ ކުރުމަށާއި ޕޯލްޓްރީ އަދި ކުދި ޖަނަވާރު ގެންގުޅުން ވެލިއު އެޑިޝަން އަދި ގަހުގެ ނާސަރީ ފަދަ ދަނޑުވެރިވެރިކަމުގެ ސިނާއަތުގެ ކަންކަމަށް މިހާތަނަށް ވަނީ ޖުމްލަ 16،009,082 ރުފިޔާގެ ލޯނު ދޫކުރެވިފައި." މިނިސްޓަރު ވިދާޅުވި އެވެ.
ރަމީލާ ވިދާޅުވީ ލޯނަށް އެދުމުގައި ދަނޑުވެރިންނަށް މިހާރު ކުރިމަތިވާ ދަތިތައް ދެނެގަނެ މިކަންކަމަށް ހައްލު ލިބޭނެހެން ލޯނު ސްކީމަށް ހެޔޮ ބަދަލުތަކެއް ގެންނަމުން އަންނަ ކަމަށެވެ.
"އެގޮތުން ރަހުނު ނުބަހައްޓާ މިވަގުތު ނެގޭ އެއްލައްކަ ރުފިޔާ ފަސްލައްކައަށް އިތުރު ކުރުމަށް އެސްޑީއެފްސީއާ ގުޅިގެން މިނިސްޓްރީން މިދަނީ މަސައްކަތް ކުރަމުން." މިނިސްޓަރު ވިދާޅުވި އެވެ.
އަދި ދަނޑުވެރިކަމަށް ދޫކުރާ ލޯނުތަކަކީ އިސްލާމިކް ފައިނޭންސް އުސޫލުން ދޫކުރާ ލޯނުތަކަކަށް ހެދުމަށް ވެސް މިނިސްޓްރީން މަސައްކަތް ކުރާ ކަމަށާއި ލަސްތަކެއް ނުވެ ހަމަޖެހޭނެ ކަމަށް މިނިސްޓްރު ވިދާޅުވި އެވެ.