ރާއްޖޭގައި ވޭޕް މަނާކުރަން ނިންމުމުން ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން މަރުހަބާ ކިޔައިފި އެވެ.
ޑަބްލިއުއެޗްއޯގެ ސައުތް އީސްޓް އޭޝިއާ ރީޖަން އިން ބުނީ ޒުވާން އުމުރުފުރާގެ މީހުންގެ މެދުގައި ވޭޕް ކުރުން އާންމުވެފައިވަނީ ކަންބޮޑުވާ މިންވަރަކަށް ކަމަށާއި ރާއްޖޭގެ މި ނިންމުމަށް މަރުހަބާ ކިޔާ ކަމަށެވެ. އެގޮތުން 2019 ގައި ގްލޯބަލް ޔޫތް ޓޮބޭކޯ ސާވޭ އިން ދައްކާ ގޮތުގައި ރާއްޖޭގެ 13 އަހަރާއި 15 އަހަރާ ދެމެދުގެ ކުދިން އީ ސިނގިރޭޓް ބޭނުން ކުރާކަަން ފާހަގަކޮށްފައިވެ އެވެ.
ދުންފަތުގެ ހުރިހާ ބާވަތްތަކަކީ ވެސް ނުރައްކަލެއް ކަމަށާއި އޭގެ ސަބަބުން ގައިންގަޔަށް ނާރާ ބަލިތަކަށް ހުށަހެޅޭ މިންވަރު އިތުރު ކަމަށްވެސް ބުނެފައިވެ އެވެ.
Congratulations #Maldives 🇲🇻 for announcing a ban on vaping. An important initiative to arrest the worrying trend of increase in vaping, specially among young adolescents. As per the 2019 Global Youth Tobacco Survey, 23.1% boys and 10.7% girls in the age group of 13 to 15 years… https://t.co/mffmWgYZL2
— World Health Organization South-East Asia (@WHOSEARO) October 15, 2024
ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން ނޮވެމްބަރު 15، 2024 އިން ފެށިގެން މަނާވާނެ އެވެ. އަދި ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި ރާއްޖޭގައި އިޝްތިހާރު ކުރުމާއި ހިލޭބެހުން ޑިސެމްބަރު 15، 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް ރައީސް ވަނީ އަންގަވާފަ އެވެ.
ރައީސްގެ ނިންމެވުން ތަންފީޒުކުރުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް މިހަފްތާގެ ތެރޭގައި މަޖިލީހަށް ފޮނުވުމަށް ކުރަންޖެހޭ މަސައްކަތް ކުރަމުންދާ ކަމަށް ބަންޑަރަ ނައިބު އަހުމަދު އުޝާމް ވަނީ ވިދާޅުވެފަ އެވެ. އެގޮތުން ދުންފަތް ކޮންޓްރޯލްކުރުމާ ބެހޭ ގާނޫނާއި ރާއްޖޭގެ އެކްސްޕޯޓް އިމްޕޯޓް ގާނޫނަށް އިސްލާހު ގެނައުމަށް މަޖިލީހަށް ހުށަހެޅުމަށް ނިންމާފައިވާ ކަމަށް އުޝާމް ވިދާޅުވި އެވެ.