ރާއްޖެ އަންނަ ޓޫރިސްޓުންގެ އަތުން ނަގާ ޓެކްސްތަކެއް ބޮޑު ކުރަން ސަރުކާރުން ނިންމުމާ ގުޅިގެން އެކަމާ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ކަންބޮޑުވުން ފާޅު ކުރައްވައިފި އެވެ.
ޓޫރިޒަމާ ބެހޭ ގާނޫނަށް އިސްލާހު ގެނެސް، ޓީޖީއެސްޓީ 16 ޕަސެންޓުން 17 ޕަސެންޓަށް އަދި ގްރީން ޓެކްސް ހަ ޑޮލަރުން 12 ޑޮލަރަށް ބޮޑު ކުރަން މަޖިލީހަށް ހުށަހަޅާފައި އޮތް ބިލަށް މިއަދުހެ ޖަލްސާގައި ވާހަކަ ދައްކަވަމުން އެމްޑީޕީގެ ޕީޖީ ލީޑަރު ޓެކްސްތައް ބޮޑު ކުރުމަކީ ބޮޑެތި ގެއްލުންތަކެއް ވާނެ ކަމެއް ކަމަށެވެ.
"ޓޫރިޒަމާ ބެހޭ ގާނޫނުގެ ތެރެއިން ޓެކްސް ބޮޑު ކުރަން ސަރުކާރުން ހުށަހަޅުއްވާފައި މި އޮތް ބަޔަށް އަޅުގަނޑު ތާއީދެއް ނުކުރަން،" ނާޒިލު ވިދާޅުވި އެވެ. "ޓެކްސް ބޮޑު ކުރަނީ ކީއްވެ ކަމެއް، ޓެކްސް ބޮޑު ކުރީމާ ދެން ވާނީ ކިހިނެއް ކަމެއް އަޅުގަނޑުމެންނަކަށް ސާފެއް ނުކޮށްދެވޭ."
އޭނަ ވިދާޅުވީ ޓީޖީއެސްޓީ އާއި ގްރީން ޓެކްސް ބޮޑު ކުރުމުން ރާއްޖެ އަށް ޓޫރިސްޓުންގެން އަންނަ އަދަދު ބޮޑުތަނުން މަދުވާނެ ކަމަށެވެ.
"އަޅުގަނޑަށް ހަމަ ޔަގީން ކަށަވަރު ޓެކްސް ބޮޑު ކުރުމާ ގުޅިގެން މި ރާއްޖެއަށް އަންނަ ޓުއަރިސްޓުންގެ އަދަދު، އެރައިވަލްސްތައް ބޮޑުތަނުން މަދުވެގެން ދާނެ،" ނާޒިލު ވިދާޅުވި އެވެ. "މީގެ ފައިދާ ކުރާނީ ކައިރި ހުރި އަވައްޓެރި ގައުމުތަކަށް."
ޓެކްސްތައް ބޮޑުކުރަން ހުށަހަޅާފައިވާ އެ ބިލުގައި ވަނީ އަންނަ އަހަރުގެ ޖޫން އިން ފެށިގެން ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑު ކުރުމަށެވެ. އަދި އަންނަ އަހަރުގެ ޖެނުއަރީން ފެށިގެން ގްރީން ޓެކްސް ހަ ޑޮލަރުން 12 ޑޮލަރަށް އިތުރު ކުރަން ހުށަހަޅައިފައި އެވެ.