މާލެ ސަރަހައްދުގައި ކެމިކަލް ރައްކާ ކުރާ ތަންތަން ބަލައި ފާސް ކުރުމަށް އެމްއެންޑީއެފުން ފެށި "އޮޕަރޭޝަން ހިރާސް ފާސް" ގެ ދަށުން 605 ތަނެއް ބަލައި ފާސްކޮށް، އެ އޮޕަރޭޝަން ނިންމާލައިފިއެވެ.
ފުލުހުން ވެސް ބައިވެރިވި މި އޮޕަރޭޝަނަކީ މި މަހުގެ 1 އިން އިއްޔެގެ ނިޔަލަށް ކުރިއަށް ގެންދިޔަ އޮޕަރޭޝަނެކެވެ.
އެމްއެންޑީއެފް އިން ވިދާޅުވީ، މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގާވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާން ރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ދެނެގަނެފައިވާ ކަމަށެވެ.
އޮޕަރޭޝަންގައި މާލެ، ހުޅުމާލެ، ވިލިމާލެ އަދި ތިލަފުށީގައި އޮޕަރޭޝަން ކުރިއަށް ގެންދިޔަ އެވެ.
މި އޮޕަރޭޝަންގައި 15 ދުވަހުގެ މަތިން، އިންސްޕެކްޝަން ޓީމްތަކުން މީހުން ދިރިއުޅޭ 399 އިމާރާތާއި ނުރައްކާތެރި ކެމިކަލް ގުދަންކުރާ 144 ގުދަނަކާއި ކެމިކަލް ވިއްކާ 62 ފިހާރައެއްގެ މައުލޫމާތު ނަގާފައިވެ އެވެ.
ޑިފެންސް މިނިސްޓްރީން ބުނީ މި އޮޕަރޭޝަން ކުރިއަށް އޮތް ތަނުގައި، ރާއްޖޭގެ އެކި ކަންކޮޅުތަކުގައި ވެސް ހިންގުމަށް ހަމަޖެހިފައިވާ ކަމަށެވެ.