އަންނަން އޮތް ޖީލު ރައީސް ޑރ. މުހައްމަދު މުއިއްޒަށް މުހާތަބު ކުރާނީ ބޮޑުތަކުރުފާނުގެ ނަމުން ކަމަށް، އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގްރީން ޓެކްސް އާއި އެއާޕޯޓްސް ޓެކްސް ބޮޑުކުރަން ހުށަހަޅާފައިވާ ބިލަށް ބަހުސްކުރައްވަމުން ފަލާހު ވިދާޅުވީ މިއަދު އުމުރުން 5 އަހަރުގެ ކުދިން، އެ ކުދިންގެ 15 އަހަރުގައި އެ ކުދިންގެ މައިންބަފައިންނަށް ރައީސް މުއިއްޒުގެ ވާހަކަ ކިޔައިދެއްވާނެ ކަމަށާއި، އެ ދުވަހު އެ ކުދިން ދެވަނަ ބޮޑުތަކުރުފާނުގެ ނަމުން ރައީސް މުއިއްޒަށް މުހާތަބު ކުރާނެ ކަމަށެވެ.
"މިއަދު އުމުރުން 15 އަހަރުގެ ބޭފުޅުން، އުމުރުން 25 އަހަރުގައި ކިޔައިދޭނެ އެއް ޒަމާނެއްގައި އުޅުނޭ ޑރ. މުހައްމަދު މުއިއްޒު ކިޔާ ރައީސެއް، ރާއްޖޭގެ ވެރިކަން ކުރެއްވިއޭ. އެ ދުވަހު އެ ބޭފުޅުން ކިޔައިދެއްވާނެ އެ ރައީސް ރާއްޖޭގެ ރައީސްކަމާ ހަވާލުވިއިރު، މި ގައުމު އޮތް ހާލަތާއި، އެ ރައީސް ފައިބައިވަޑައިގެން ދިޔައިރު އެ ރައީސް މި ގައުމަށް ކޮށްދެއްވި ހިދުމަތާއި، ގެނެސްދެއްވި ތަހުޒީބާއި، ރައްޔިތުންނަށް ކޮށްދެއްވި އާދަޔާ ހިލާފު ކަންތައްތަކުގެ ވާހަކަ އެ ދުވަހު މިއަދުގެ 15 އަހަރުގެ ކުދިން 25 އަހަރުގައި ކިޔައިދޭނެ،" ފަލާހު ވިދާޅުވި އެވެ.
ފަލާހު ވިދާޅުވީ މި ސަރުކާރުން ކުރަމުން އަންނަނީ ވަރަށް މުހިއްމު މަސައްކަތްތަކެއް ކަމަށާއި ޓެކްސް އަށް ގެންނަ ބަދަލުގެ ސަބަބުން ރައްޔިތުންނަށް އެއްވެސް ބުރައެއް ނުވާނެ ކަމަށެވެ. ޓެކްސް ބޮޑުކުރުމުން ރައްޔިތުންގެ ތަރައްގީއަށްޓަކާ ކުރަން ބޭނުންވާ ކަންކަން ކުރުމަށް ވަރަށް ބޮޑަށް މަގުފަހިވެގެންދާނެ ކަމަށްވެސް ފަލާހު ވިދާޅުވި އެވެ.
ރައީސް މުއިއްޒު ކުރައްވާ ކަމަކީ ދައުލަތުގެ ހަރަދުތައް ކުޑަކޮށް، ދައުލަތަށް އާމްދަނީ ލިބޭނެ ގޮތްތައް އިތުރުކުރުން ކަމަށާއި އެމްޑީޕީގެ ވެރިކަމުގައި ހަރަދުތައް ބޮޑުކޮށް އަދި އާމްދަނީ ލިބެން ހުރި މަގުތައް ބަންދުކުރީ ކަމަށްވެސް ފަލާހު ވިދާޅުވި އެވެ.