ޓެކްސްތައް ބޮޑުކުރިޔަސް ރާއްޖޭގެ ރީތިކަން ދެކިލަން ޓޫރިސްޓުން އަންނާނެ ކަމަށް ފޭދު އުތުރު ދާއިރާގެ މެމްބަރު އިސްމާއިލް ނިޒާރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ޖަލްސާގައި ވާހަކަދައްކަމުން ނިޒާރު ވިދާޅުވީ މީގެކުރިން ވެސް އެކި ސަރުކާރުތަކުން ޓެކްސް އަށް ބަދަލުތައް ގެނައިތަން ފެނުނު ކަމަށާއި ނަމަވެސް ޓޫރިސްޓުން ރާއްޖެ އަންނަ މިންވަރު މަދުވިތަނެއް ފެނިގެން ގޮސްފައި ނުވާއިރު ކުރިއަށް އޮތް ތަނުގައި ވެސް އެކަން އޮންނާނީ އެގޮތަށް ކަމަށެވެ.
"އަހަރަކުން އަހަރަކަށް ފެނިގެންދިޔައީ ރާއްޖޭގެ ރީތިކަން ދެކެން، ރާއްޖޭގެ ގުދުރަތީ ވަސީލަތްތައް ރީތި މަންޒަރުތައް ބަލާލަން ފަތުރުވެރިން އައި މިންވަރު އިތުރުވެގެން އައި މަންޒަރު،" އޭނާ ވިދާޅުވި އެވެ.
ޓެކްސްތައް ބޮޑުކުރި ނަމަވެސް ރާއްޖެ އަށް ޓޫރިސްޓުން ގެނެވެން އޮތީ ކޮން ގޮތްތަކަކުންތޯ ހޯދައި، އެ ގޮތްގޮތަށް މަސައްކަތް ކުރުން މުހިއްމު ކަމަށާއި މިފަދަ ބަދަލުތައް ގެނައުމުގެ އެންމެ ބޮޑު ބޭނުމަކީ ރާއްޖެ އަށް ވަންނަ ބޭރު ފައިސާގެ މިންވަރު އިތުރުކުރުން ކަމަށް އިސްމާއިލް ވިދާޅުވި އެވެ.
ޓެކްސްތައް އިތުރުކޮށްގެން ދައުލަތަށް އަންނަ އަހަރު ގާތްގަނޑަކަށް 1.7 ބިލިއަން ރުފިޔާގެ އާމްދަނީއެއް ލިބޭނެ ކަމަށާއި އެ ފައިސާ ހަރަދުކުރަން ހަމަޖެހިފައިވަނީ ރާއްޖޭގެ ތަރައްގީގެ ކަންކަމަށާއި އިގްތިސާދު އިތުރަށް ހަރުދަނާ ކުރުމަށް ކަމަށްވެސް ވިދާޅުވި އެވެ.
ސަރުކާރުގެ ފަރާތުން ވަނީ ޓޫރިސްޓުން އަތުން ނަގާ ގްރީން ޓެކްސް ބޮޑުކުރުމަށާއި، ފަތުރުވެރިކަމުގެ މުދަލާއި ހިދުމަތުން ނަގާ، ޓީޖީއެސްޓީ އާއި އެއާޕޯޓް ޓެކްސް ބޮޑުކުރުމަށް ރައްޔިތުންގެ މަޖިލީހަށް ހުށަހަޅާފަ އެވެ.
އެ ބިލުތައް މަޖިލީހަށް ބަލައިގަނެ ދިރާސާކުރަން މިހާރު ވަނީ މަޖިލީހުގެ މުޅި ކޮމިޓީއަށް ފޮނުވާފަ އެވެ.