އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން ރައްޔިތުންގެ މަޖިލީހަށް އެމްޑީޕީން ބިލެއް ހުށަހެޅީ ހެޔޮ ނިިޔަތެއް އޮވެގެން ނޫން ކަމަށް ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ބިލެއް ހުށަހެޅީ ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް ނަސީމެވެ. އެ ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ 100 އަށް ވުރެ ގިނަ ދުވަސް ވެފަ އެވެ.
ރައްޔިތުންގެ މަޖިލީހުގެ މިއަދު ޖަލްސާގައި ވާހަކަދައްކަމުން ޝުޖާއު ވިދާޅުވީ އިޒްރޭލު ޕާސްޕޯޓު މަނާކުރަން ޕީއެންސީ އޮތީ ތައްޔާރަށް ކަމަށާއި ނަމަވެސް އެކަން ކުރަން އެމްޑީޕީ އޮތީ ތައްޔާރަށް ނޫން ކަމަށެވެ. އަދި އެ ބިލު މަޖިލީހަށް ލެވުނީތީވެ އެކަމާ ބޯހަލާކުވާ ވާހަކަ އެމްޑީޕީގެ މެމްބަރުން ކުޑަދޮށުގައި ތިބި ދައްކަމުންދާ ކަމަށާއި މިކަމުގައި އެމްޑީޕީގެ އިހުލާސްތެރިިކަމެއް ނެތް ކަމަށް ޝުޖާއު ވިދާޅުވި އެވެ.
"ވަރަށް މަކަރުވެރިކަމާ އެކީ އެމްޑީޕީން ލާފައި އޮތް އިސްލާހެއް އެއީ. އެހެން ނަމަވެސް އަޅުގަނޑުމެންގެ އިހުލާސްތެރި ނިޔަތް އެބައޮތް،" ޝުޖާއު ވިދާޅުވި އެވެ.
މިކަމުގައި އެމްޑީޕީގެ ހެޔޮ ނިޔަތެއް ނެތް ނަމަވެސް އިޒްރޭލްގެ ޕާސްޕޯޓު މަނާކުރާނެ ކަމަށާއި އަދި ފަލަސްތީނުގެ ހައްގުގައި ކުރެވެން އޮތް ކޮންމެ މަސައްކަތެއް ވެސް ކުރާނެ ކަމަށް ޝުޖާއު ވިދާޅުވި އެވެ.