ރާއްޖޭގައި ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ދަށުން ކުރިއަށް ގެންދާ "ކުރަނގި" އޮޕަރޭޝަންގެ ދަށުން މިހާތަނަށް 4،000 އަށް ވުރެ ގިނަ މީހުންގެ ބަޔޮމެޓްރިކް ޑާޓާ އެއްކޮށްފި އެވެ.
ހޯމްލޭންޑް މިނިސްޓްރީން އެ އޮޕަރޭޝަން ފެށީ މެއި މަހުގެ 2 ގަ އެވެ.
ރާއްޖޭގެ ހުރިހާ ރަށެއްގައި ވެސް މި އޮޕަރޭޝަން ކުރިއަށްގެން ދިޔުމަށް ނިންމާފަވާއިރު މީހުން ދިރިއުޅޭ 45 ރަށެއްގައި މިހާރު ވަނީ މި އޮޕަރޭޝަން ފަށައިފައެވެ. އެގޮތުން މިހާތަނަށް 8 ރަށެއްގައި ތިބި ހުރިހާ ބިދޭސީންގެ މައުލޫމާތު ނަގާފައެވެ.
އެ ރަށްތަކުން ޖުމްލަ 4،272 ބިދޭސީއެއްގެ ބަޔޮމެޓްރިކް ޑާޓާ އެއްކޮށްފައިވެ އެވެ.
ބިދޭސީންގެ މައުލޫމާތުތައް މިހާތަނަށް އެއްކުރި ރަށްތަކާއި އަދަދު:
* ހއ. ދިއްދޫން 390 ބިދޭސީން
* ރ. އަލިފުށިން 178 ބިދޭސީން
* ރ. ދުވާފަރުން 140 ބިދޭސީން
* ކ. ގާފަރުން 105 ބިދޭސީން
* ކ. ހިންމަފުށިން 701 ބިދޭސީން
* ކ. މާފުށިން 1،076 ބިދޭސީން
* ލ. ގަމުން 200 ބިދޭސީން
* އައްޑޫ ހިތަދޫން 114 ބިދޭސީން
މި ޕްރޮގްރާމުގެ ފުރަތަމަ މަރުހަލާގައި ބިދޭސީ މަސައްކަތްތެރިންގެ މައުލޫމާތު އެއްކުރި ނަމަވެސް އެ ފަރާތްތަކާ މެދު ފިޔަވަޅު އެޅުމަކީ މަގުސަދެއް ނޫނެވެ. އެގޮތުން ގަވާއިދާ ޚިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުސަތު ފަހިކޮށް ދޭނެ އެވެ.
ފުރަތަމަ މަރުހަލާ ނިމުމަށް ފަހު ރަސްމީ ލިޔެކިޔުން ނެތި، ގަވާއިދާއި ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަނެއް ހަދައި، ޤައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލުމަށް ވަނީ ނިންމައިފަ އެވެ.
ސަރުކާރުގެ އަމާޒަކީ ތިން އަހަރުގެ ތެރޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމެވެ.