ގްރޭ ޝޭޑްސް އެކުލެވޭ ކެރެކްޓާތައް މިހާރު މާ ޝައުގުވެރި ކަމަށާއި އެފަދަ ރޯލުތަކެއް ކުޅެން ބޭނުންވާ ކަމަށް ޝާހްރުކް ޚާން ބުނެފި އެވެ.
މީޑިއާއަކަށް ދިން އިންޓަވިއުއެއްގައި ކާމިޔާބު އެތައް ފިލްމެއް ކުޅެފައިވާ 58 އަހަރުގެ އެކްޓަރު ބުނީ އޭނަގެ ނަޒަރުގައި ނެގަޓިވް ކެރެކްޓާތަކަކީ މިހާރު "އަސްލު ހީރޯ" އިން ކަމަށް ދެކޭ ކަމަށެވެ. އެހެންވެ އެފަދަ ރޯލުތަކާ މެދު އެކްޓަރުން ދެކޭ ވެސް ވަރަށް ބޮޑަށް ބަދަލުވެއްޖެ ކަމަށާއި އާ ގޮތްގޮތަށް ނެގަޓިވް ރޯލުތައް މިހާރު ފިލްމުތަކުގައި ވަރަށް ފުރިހަމަ ޕްރެޒެންޓްކޮށް ދެމުން އަންނަ ކަމަށް ވެސް ޝާހްރުކް ބުންޏެވެ.
"އެހެންވެ އަހަރެން ވެސް އަހަރެންގެ އަމިއްލަ ސްޓައިލްގައި އެފަދަ ރޯލުތަކަށް އިންސާފުކޮށް ދޭން މިހާރު ބޭނުން." ކެރިއަރުގެ ވަރަށް ކުރީކޮޅު ބާޒީގަރު އާއި ޑަރްގައި ނެގަޓިވް ރޯލު ކުޅެގެން ބެލުންތެރިންގެ ލޯބި ހޯދި އެކްޓަރު ބުންޏެވެ.
ޝާހްރުކްގެ ތިން ފިލްމެއް މިދިޔަ އަހަރު ރިލީޒްވި އެވެ. އެއީ "ޕަތާން" އާއި "ޖަވާން" ގެ އިތުރުން "ޑަންކީ" އެވެ. "ޖަވާން" ގައި އޭނަގައި ވެސް ޝާހްރުކްގެ އެއް ކެރެކްޓާގައި ގްރޭ ޝޭޑްސް އެކުލެވެ އެވެ.
ރިޕޯޓްތައް ބުނާ ގޮތުން އޭނަގެ ކުރިއަށް އޮތް ފިލްމަކީ "ކިންގް" ކިޔާ އެކްޝަން ތުރިލާއެކެވެ. އަންނަ އަހަރުގެ ކުރީކޮޅު ޝޫޓިން ފަށާނެ ކަމަށް ބެލެވޭ މި ފިލްމުގައި ޝާހްރުކްގެ ދަރިފުޅު ސުހާނާ ޚާން ވެސް ހިމެނޭ އިރު، ފިލްމު ޑައިރެކްޓްކުރާނީ ސުޖޯއި ގޯޝް އެވެ.