މޯލްޑިިވްސް ޕޮލިޓެކްނިކްގެ ތަމްރީނު ޕްރޮގްރާމްތައް އަތޮޅުތެރެއަށް ފުޅާކުރަން އަމާޒު ހިފައިފި އެވެ.
އެތަނުގެ ސީއީއޯ ޒޫޝާން ކަމާލުއްދީން ވިދާޅުވީ ހަމައެކަނި މާލެ އިން ތަމްރީނު ފޯރުކޮށް ދޭނެ ފަރާތްތަށް ހޯދުމުގެ ބަދަލުގައި، އަތޮޅުތެރޭގައި ތިއްބެވި ތަޖުރިބާކާރު، ޢިލްމީ ބޭފުޅުންނާ އެކު، ރާއްޖޭގެ އެކި ކަންކޮޅުތަކަށް ތަމްރީނުގެ ފުރުޞަތުތަށް ފަހިކޮށް ދިނުމަށް މިހާރު މަސައްކަތްތަކެއް ކުރަމުން އަންނަ ކަމަށެވެ.
އޭނަ ވިދާޅުވީ އަތޮޅުތެރެއަށް ދަތުރުކޮށް ބަލައި ހޯދުމުން ރާއްޖެއަށް ބެނުންވާ އެކި ދާއިރާތަކުން ހުނަރުވެރިންނާއި ދިމާވާ ކަމަށެވެ. އަދި އެފަރާތްތައް ތިބީ އެ ދާއިރާތަކުން މީހުން ބިނާކުރުމަށް ޕޮލިޓެކްނިކާ ގުޅިގެން މަސައްކަތް ކުރަން ތައްޔާރަށް ކަމަށެވެ.
"ރާއްޖޭގެ އެކި ރަށްތަކުގައިވާ ޕޮލިޓެކްނިކްގެ ކެމްޕަސްތަކަށް މާލެ އިން ބޭފުޅުން ގެނައުމުގެ ބަދަލުގައި، އެ ރަށެއްގައި ތިއްބެވި ތަޖުރިބާކާރު، އިލްމީ ބޭފުޅުން މެދުވެރިކޮށް، ރަށުގައި ތަމްރީނު ފޯރުކޮއްދިނުމުން ޚަރަދު ކުޑަވުމާއި، ރަށުގައި ވަޒީފާގެ ފުރުޞަތުތަށް އިތުރުވުމާއި، ތަމްރީނުވުމުގައި ލުއި ފަސޭހަވުން ފަދަ އެތައް ފައިދާއެއް ލިބިގެން ދާނެ." ޒޫޝާން ވިދާޅުވި އެވެ.
އެހެންވެ މޯލްޑިވިސް ނެޝަނަލް ސްކިލްސް ޑިވެލޮޕްމަންޓް (އެމްއެންއެސްޑީއޭ) މެދުވެރިކޮށް، އަތޮޅުތެރޭގައި ތިބި އެކި ދާއިރާތަކުގެ ތަޖުރިބާކާރު، ޢިލްމީ ބޭފުޅުންނަށް ޤައުމީ ސަނަދު ހާޞިލުކޮށް، ނެޝެނަލް އެސެސަރުންގެ ގޮތުގައި ރަޖިސްޓްތޯވުމުގެ ފުރުޞަތު ހުޅުވާލުމަށް ވެސް ވަނީ ނިންމައިފަ އެވެ.