ޑްރަގް ވިއްކި ބަޔަކު އުމުރަށް ޖަލަށް

ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ކުރި ބަޔަކު 25 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.

ކްރިމިނަލް ކޯޓުން އިއްޔެ ހުކުމްކުރި މީހުންގެ ތެރޭގައި ހިމެނެނީ ހަތަރު މީހެކެވެ. އެއީ ތިނަދޫ ސިޓީ، ރަންގަލް، ޙަސަން ލޫތު، 45، އާއި ހުޅުމާލެ ފްލެޓް ނަންބަރު 01-ޖީ-45 ޙަސަން ރަޝީދު، 36، އާއި ތ. ތިމަރަފުށީ ވައިޓްރޯސް، އިސްމާޢީލް ޝަރީފް، 43، ގެ އިތުރުން މއ. ހަސްލަތު، ޝާނިޔާ އިބްރާހިމް، 33، އެވެ.

މި މީހުންނަށް އިއްވި ޖަލު ހުކުމުގެ އިތުރަށް ޖޫރިމަނާ ވެސް ކޮށްފައިވެ އެވެ. އެގޮތުން ލޫޠު 2،000،000ރ. އިން ޖޫރިމަނާކޮށްފައިވާއިރު ރަޝީދު 1،000،000ރ. އިން، އަދި ޝަރީފާއި ޝާނިޔާ 500،000ރ. ރުފިޔާ އިން ޖޫރިމަނާކޮށްފައިވެ އެވެ.

މި ހަތަރު މީހުންނަކީ ރާއްޖެއަށް މަސްތުވާތަކެތި އެތެރެކޮށް، އެތަކެތި ބޭނުންކޮށް، ގެންގުޅެ އަދި ޓްރެފިކް ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ޖެނުއަރީ 12، 2021 ގައި ހިންގި އޮޕަރޭޝަނެއްގައި އަތުލައިގަތް ބައެކެވެ.

އެ މައްސަލައާ ގުޅިގެން އެ މީހުންނާ ގުޅުންހުރި މާލޭގެ ހަތަރު ތަނެއް ފުލުހުން ބަލައިފާސްކޮށްފައިވެ އެވެ. އެގޮތުން ގ. ނީ، މއ. ހަނީސަކަލް، މ، ބުރެހިމާގެ އަދި މ. ރޭއަލި ގެސްޓު ހައުސް ބަލައިފާސްކުރުމުގެ ތެރެއިން، 54 ގްރާމް ޑައިމޯފިން އާއި 266 ގްރާމް ކެނަބިސް ފެނިފައިވެ އެވެ.

މީގެ އިތުރުން ޝަރީފާއި ޝާނިޔާ ހުރި ގެސްޓްހައުސް ކޮޓަރިން 1.5 މިލިޔަނަށް ވުރެ ގިނަ ރުފިޔާ ފެނިފައިވެ އެވެ.