ފިހާރަކުން ރެޑް ބުލް ހަތަރު ދަޅު ވަގަށް ނެގި މީހަކަށް ވައްކަކަމުގެ ކުށް ސާބިތުވި ދެ މަހަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
މިދިޔަ ހޯމަ ދުވަހު އެ ހުކުމް އިއްވާފައި ވަނީ ފުވައްމުލަކު، ހޯދަޑު/ ދުންނިކަގޭ މުހައްމަދު ހަނީޝް ހަފީޒުގެ މައްޗަށެވެ.
އޭނަ އަށް މި ހުކުމް އައީ އޮކްޓޯބަރު 27، 2022 ގެ ހެނދުނު 8:20 ހާއިރު މާލެ "އަފާސްމާޓް" ފިހާރައިގެ ރެކުން ރެޑް ބުލް ހަތަރު ދަޅު ވަގަށް ނެގި މައްސަލައާ ގުޅިގެން ކުރި ދައުވާއާ ގުޅިގެންނެވެ.
އެ ދައުވާ އަށް ޖަވާބުދާރީވާން ދިން ފުރުސަތުގައި ދައުވާއާ ގުޅިގެން އެއްވެސް އެއްޗެއް ބުނަން ބޭނުން ނުވާ ކަމަށް ހަނީޝް ބުނުމުން ދައުލަތުން ނިންމީ ދައުވާއަށް އިންކާރުކުރީ ކަމަށެވެ. އަދި ދައުވާ ސާބިތުކުރުުމަށް ދައުލަތުން 7 ހެކި ހުށެހެޅި ނަމަވެސް ދިފާއުން ހެއްކެއް ހުށަހަޅައިފައެއް ނުވެ އެވެ.
ހެކި ބަސް ދިން ފުލުހުންގެ ސާޖަންޓް ހަމްދޫން މުހައްމަދު ބުނީ ހަނީޝް ފިހާރައިގެ ރެކުން ރެޑް ބުލް ދަޅުތަކެއް ނަގައި އޭނަގެ ޖިންސު ތެެރެއަށްލައި ފިހާރައިން ނިކުންނަ މަންޒަރު ވީޑިއޯ އިން ފެންނަ ކަމަށެވެ.
ކުށުގެ ދަރަޖައަށް ބަލާއިރު 500ރ. އަށް ވުރެ އަގު ދަށް މުދަލެއް ވަގަށް ނަގައިފި ނަމަ އެ ކުށަކީ ޖުނަހުގެ ދެވަނަ ދަރަޖައިގެ ކުށެކެވެ. އެހެންކަމުން ރެޑް ބުލް ހަތަރު ދަޅުގެ އަގަކީ 160ރ. އެވެ. އަދި އެ ކުށުގެ އަދަބުގެ އަސާސީ މިންގަނޑަކީ ދެ މަހާއި 12 ދުވަށް ޖަލަށްލުމެވެ.
ހަނީޝް ބަންދުގައި ހޭދަކުރި 30 ދުވަހު އުނިކޮށް އޭނަ މިހާރު ތަންފީޒު ކުރަން ޖެހެނީ މަހަކާއި 12 ދުވަހުގެ ޖަލު ހުކުމެކެވެ.