އިސްލާމިކް ޔުނިވަސިޓީ އޮފް މޯލްޑިވްސް (އައިޔޫއެމް) އިން ހާފިޡުން އިމްތިހާން ކުރުމަށް ހުޅުވާލައިފި އެވެ.
ހާފިޡުން އިމްތިހާނު ކުރަނީ އެކަމަށް އެކުލަވާލާފައިވާ ފަސް މެމްބަރުންގެ މައްޗަށް އެކުލެވޭ ކޮމެޓީއަކުންނެވެ. އިސްލާމިކް މިނިސްޓްރީން ކަނޑައަޅާފައިވާ އެ ކޮމިޓީގައި ހިމެނިވަޑައިގަންނަވަނީ:
1- އުސްތާޛު އިބްރާހިމް ރަމްޒީ (ކޮމެޓީގެ ރައީސް)
2- އުސްތާޛު އިބްރާޙިމް ޒުހައިރު
3- އުސްތާޛު އަލީ އިބްރާޙިމް ދީދީ
4- އުސްތާޛު ހަސަން މުޙައްމަދު އަބްދުލް ހަމީދު އަލް ކުރިދީ
5- އުސްތާޛު ސަލްވާ މުޙައްމަދު ލަތީފު
އައިޔޫއެމްގެ ކުއްލިއްޔާ، ޤުރުއާން އެންޑް ސުންނާގެ ޑީން މުޙައްމަދު މަންސޫރު އާދަމް ވިދާޅުވީ، ޤުރުއާން މެމޮރައިޒޭޝަން ޕްރޮގްރާމުގައި 200 އަށް ވުރެ ގިނަ ދަރިވަރުން މިހާރު ވެސް ކިޔަވަމުން ގެންދާ ކަމަށާއި އިތުރު ޕްރޮގްރާމެއްގައި ޤުރުއާން ހިތުދަސްކޮށްފައިވާ ދަރިވަރުން މިހާރު ވެސް ތިބި ކަމަށެވެ.
އައިޔޫއެމްގައި ޤުރުއާން ހިތުދަސްކުރާ ދަރިވަރުން ވެސް މީގެ ކުރިން އިމްތިހާނު ކުރަމުން އައީ ޤުރުއާނާ ބެހޭ މަރުކަޒުންނެވެ. އެހެންކަމުން އަލަށް ހުޅުވާލި ފުރުސަތުން އެ ޔުނިވާސިޓީގައި ކިޔަވަމުން އަންނަ ދަރިވަރުންނަށް ފަސޭހަތަކެއް ލިބިގެންދާނެ އެވެ.
އައިޔޫއެމްގައި ކިޔަވާ ދަރިވަރުންގެ އިތުރުން އާންމު ފަރާތްތަކަށް ވެސް އިމްތިޙާނުގައި ބައިވެރިވާން ހުށައެޅޭނެ އެވެ.
އިމްތިހާނުގައި ބައިވެރިވާން ފޯމެއް ހުށައަޅަން ޖެހޭނެ އެވެ. އަދި އިމްތިޙާނުގައި ބައިވެރިވުމުގެ ފެންވަރު ހުރިތޯ ޔަޤީން ކުރުމުގެ ގޮތުން ޓެސްޓެއް ކުރިއަށް ގެންދާނެ އެވެ.
ހާފިޡުން ތަމްރީނު ކުރާ ސެންޓަރެއްގެ ގޮތުގައި އިސްލާމިކް މިނިސްޓްރީން އައިޔޫއެމް ހަމަޖެއްސީ މި އަހަރުގެ ޖުލައި 9 ގަ އެވެ. އެ ހުއްދައާ އެކު ހާފިޡުން އިމްތިޙާނު ކުރުމުގެ އެންމެހާ އުޞޫލުތައް އެ ޔުނިވަސިޓީން ވަނީ އެކުލަވާލައިފަ އެވެ.