އެމެރިކާގެ ޓެކް ކުންފުނި، އިންޓެލް ކޯޕަރޭޝަނުން ޗައިނާގައި ވިއްކާ އުފެއްދުންތަކުން ގައުމީ ސަލާމަތަށް ނުރައްކާވެދާނެ ކަމަށް ސައިބަސެކިއުރިޓީ އެސޯސިއޭޝަން އޮފް ޗައިނާ ސީއެސްއީސީ) އިން ބުނެފި އެވެ.
އެތަނުން މިއަދު އާންމުކުރި ރިޕޯޓެއްގައި ބުނީ މިކަމާ ހެދި އިންޓެލްގެ އުފެއްދުންތައް ޗައިނާގެ ކަމާބެހޭ ފަރާތްތަކުން އިތުރަށް ރިވިއު ކުރަން ޖެހޭ ކަމަށެވެ. އެހެން ނޫން ނަމަ ގައުމީ ސަލާމަތަށް އިންޓެލްގެ ސަބަބުން ނުރައްކާވެދާނެ ކަމަށާއި މީގެ ސަބަބުން މަސްލަހަތަށް ވެސް ނޭދެވޭ އަސަރުތަކެއް ކުރުން އެކަށީގެންވާ ކަމަށް އެ އެސޯސިއޭޝަނުން ބުންޏެވެ.
މިކަމާ ގުޅިގެން އިންޓެލްގެ ޗައިނާ ޔުނިޓުން ބުނީ ކުންފުނީގެ އުފެއްދުންތަކުގެ ރައްކާތެރިކަމާ ދޭތެރޭ ސުވާލު އުފައްދާނެ ޖާގައެއް ނޯންނާނެ ކަމަށެވެ. އަދި އިންޓެލްގެ ކޮންމެ އުފެއްދުމަކީ ރައްކާތެރި އަދި ފެންވަރު ރަނގަޅު ތަކެއްޗަށް ހެދުމަކީ އަބަދު އެންމެ ބޮޑު އިސްކަންދޭ ކަންތައް ކަމަށް ބުންޏެވެ.
"އެހެންވީމަ އަހަރެމެންގެ ޕްރޮޑަކްޓްތަކާ ގުޅޭ ގޮތުން ކަންބޮޑުވުންތަކެއް ހުރި ނަމަ ކަމާބެހޭ އިދާރާތަކަށް އަބަދު ވެސް މުއާމަލާތް ކުރަން ދޮރު ހުންނާނީ ހުޅުވިފައި." އިންޓެލްގެ ޗައިނާގެ ޔުނިޓުން ނެރުނު ބަޔާނެއްގައި ބުންޏެވެ.
ޗައިނާ އާއި އެމެރިކާއާ ދެމެދު ބޮޑު ވާދަވެރިކަމެއް އޮންނަ އިރު، ޗައިނާގެ އުފެއްދުންތަކުން އެމެރިކާ އަށް ޖާސޫސްކުރާ ކަމަށް ތުހުމަތުތުކޮށް، ޗައިނާގެ ބައެއް ކުންފުނިތައް އެމެރިކާ އިން މީގެ ކުރިން ބްލެކްލިސްޓް ވެސް ކުރި އެވެ. އޭގެ ތެރޭގައި ޗައިނާގެ މަޝްހޫރު ކުންފުނި ވާވޭ ފާހަގަކޮށްލެވެ އެވެ.