ރާއްޖެ އާއި އެމެރިކާގެ ގުޅުން ބަދަހިކުރުމަށް ދެ ގައުމުގެ މެދުގައި މަޝްވަރާކޮށްފި އެވެ.
މި މަޝްވަރާ ބައްދަލުވުން ބާއްވާފައިވަނީ އެމެރިކާއިން ރާއްޖެއަށް ކަނޑައަޅާފައި ހުންނަ ސަފީރު ހޫގޯ ޔޫ-ހޯ ޔޮން، ފޮރިން މިނިސްޓަރު ޑރ. އަބްދުﷲ ހަލީލްއާއެކު މިއަދު ބޭއްވި ބައްދަލުވުމުގަ އެވެ.
ފޮރިން މިނިސްޓްރީން ބުނީ މި ބައްދަލުވުމުގައި ދެ ގައުމުގެ ގުޅުން ބަދަހިކުރުމާއި އަދި ތަފާތު އެކި ދާއިރާތަކުން އެއްބާރުލުން ދިނުމާއި ގުޅޭގޮތުން މަޝްވަރާކޮށްފައިވާ ކަމަށެވެ.
އެމެރިކާ އިން ދާދިފަހުން ވަނީ ދައުލަތުގެ މާލިއްޔަތު ބެލެހެއްޓުމުގައި ރާއްޖޭގެ ފަންނީ ގާބިލުކަން އިތުރުކޮށް، ރާއްޖޭގެ އިގްތިސާދީ އަދި ޑިމޮކްރެޓިކް ވެރިކަން އިތުރަށް ހަރުދަނާކުރުމަށް ރާއްޖެއަށް 8.5 މިލިއަން ޑޮލަރުގެ އެހީއެއް ދީފަ އެވެ.