ކުރީގެ ޑިފެންސް މިނިސްޓަރު މުހައްމަދު ނާޒިމް ހައްޔަރު ކުރުމަށް ފުލުހުން ދިޔަ ވެހިކަލްގައި ޕްރޮސެކިއުޓަ ޖެނެރަލް މުހުތާޒު މުހްސިން އިންނެވި ކަމަށް ޝައިޚް ހުސައިން ރަޝީދު ވިދާޅުވެއްޖެއެވެ.
އެމްޑީޕީ ހަރުގޭގައި ހުކުރު ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ޝެއިހް ހުސައިން ރަޝީދު ވިދާޅުވި ގޮތުގައި ނާޒިމް ހައްޔަރުކުރި ރޭ ފުލުހުންގެ ވެހިކަލްގައި މުހްތާޒު އިންނެވި ކަމަށް، ވިދާޅުވީ އޭނާގެ ރަހްމަތްތެރި އެކެވެ. އެ ރަހްމަތްތެރިޔާގެ އެކަން އެނގުނީ ސީދާ މުހްތާޒު އެހެން ވިދާޅުވުމުން ކަމަށް ވެސް ހުސައިން ރަޝީދު ވިދާޅުވި އެވެ.
"ނާޒިމް ނަގަން ފުލުހުން ދިޔަ ރޭ ފުލުހުންގެ ޖިޕްގައި އެ ބުނާ ޕީޖީ ހުއްޓޭ. ޕީޖީގެ އަގައިން އަޅުގަނޑުގެ ރައްޓައްސެއްގެ ގާތު ބުނުމުން އޭނާ އަޅުގަނޑު ގާތު ބުނީ،" ހުސައިން ރަޝީދު ވިދާޅުވިއެވެ.
ޝެއިހް ހުސައިން ވިދާޅުވި ގޮތުގައި، ކުރީގެ ރައީސް މައުމޫން އަބްދުލްގައްޔޫމާއި ރައީސް އަބްދުﷲ ޔާމީން އަބްދުލްގައްޔޫމަށް ބޮޑު ބޭބެ ވިދާޅުވާ މައުމޫން ހަމީދު ޕީޖީގެ މަގާމަށް ގެނައުމަށް ސަރުކާރުން ދެކޮޅު ހެދީ، މިފަދަ ކަންކަން ކުރެއްވުމަށެވެ.
ނާޒިމް ދިރިއުޅުއްވަމުން ގެންދެވި ގ.އެނިފުން ފިސްތޯލައަކާއި ތިން ވަޒަން ފެނިފައިވާ ކަމަށް ބުނެ އޭނާ ހައްޔަރުކޮށްފައިވަނީ މިދިޔަ ޖެނުއަރީ މަހުގެ ތެރޭގައެވެ.
ހަނގުރާމަވެރި ހަތިޔާރު ގެންގުޅުނު ކަމުގެ ދައުވާ ސާބިތުވާ ކަމަށް ނިންމައި ނާޒިމް 11 އަހަރަށް ޖަލަށް ލުމަށް ހުކުމްކޮށްފައިވާ އިރު، ކްރިމިނަލް ކޯޓުގެ ހުކުމްގައި ބޮޑެތި މައްސަލަތަކެއް ހުރިކަމަށް ނާޒިމްގެ ޤާނޫނީ ވަކީލުން ވަނީ ބުނެފައެވެ.