ފާއިތުވެދިޔަ ރަމަޟާން މަސްތަކުގައި ވެސް އެންމެ ގިނަ ބަޔަކު ކަންބޮޑުވުން ފާޅުކުރަމުން ދިޔަ އެއްކަމަކީ، ރަމަޟާން މަހުގެ ދުވާލު ގަޑީގައި މީހުން ދިރިއުޅޭ ސަރަޙައްދުތަކާއި ދުރު ހިސާބުތަކަށް ގޮސް ގްރޫޕްތައް ހަދައިގެން ކެއުމުގެ މައްސަލައެވެ.
މިގޮތަށް ދުވާލުގަޑީގައި ކެއުން ބުއިން ކުރިއަށް ގެންދާ މީހުންގެ ތެރޭގައި ގިނަ އަދަދަކަށް ފާހަގަ ކުރެވިފައިވަނީ ޒުވާން އުމުރުގެ ކުދިންނެވެ. އެހެން ނަމަވެސް، ހަގު އުމުރުގެ ބައެއް މީހުންވެސް ރޯދަ މަހު ދުވާލު ވަލުތެރޭގައި ކެއުން ބުއިން ކުރިއަށް ގެންދާކަން ވަނީ ފާހަގަކުރެވިފައެވެ.
ހިތަދޫގައި ދުވާލު ގަޑީގައި މިގޮތަށް ކައިބޮއެ ހަދާ ޒުވާނުން އެންމެ ގިނައިން ގޮސް އުޅޭކަމަށް ފާހަގަކުރެވިފައިވަނީ ކޯއްޓޭ ސަރަހައްދާއި އީސީސީ ހުންނަ ސަރަހައްދަށެވެ. މައުލޫމާތު ލިބިފައިވާ ގޮތުގައި ރޯދަމަހުގެ ފުރަތަމަ ދުވަހު ވެސް އެސަރަހައްދު ތަކުގައި ތިބޭ ފިހާރަތަކުން އާދަޔާ ޚިލާފަށް ގިނައިން މަސްދަޅާއި ޕާން ވިކެއެވެ.
ކޯއްޓޭގެ އިތުރުން ހަންކެޑެ އާއި އާރްއޭފްގެ އެކި ސަރަހައްދުތަކަށް ވެސް ގްރޫޕްތައް ހަދައިގެން ގޮސް ކައިބޮއި ހަދާކަން ވަނީ ފާހަގަކުރެވިފައެވެ.
އައްޑޫ ސިޓީގައި ފުޅާ ދާއިރާއެއްގައި ހޯލްސޭލް ވިޔަފާރި ކުރާ ފިހާރައެއްގައި މަސައްކަތް ކުރާ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި ބައެއް ރަށްރަށުގެ އެކަހެރި ހިސާބުތަކުގައި ހުންނަ ފިހާރަތަކަށް ރޯދަމަހުގެ ދުވަސްވަރު އާދަޔާ ޚިލާފަށް ލުއި ކާނާގެ ބާވަތްތައް ގެންދާ ކަމަށެވެ.
"ރޯދަ މަހު އެބަގެންދޭ އެނާޖީ ޑްރިންކާއި ޕެކެޓް ޖޫސްތައް 10 ކޭހުން. މީގެ ކުރިން އެ ފިހާރަތަކުން މަހެއްގެ މައްޗަށް މިގެންދަނީ 2 ކޭސް ވަރު. " އޭނާ ބުންޏެވެ.
ރީޓެއިލް ފިހާރަތައް ހިންގާ އެއްވެސް ވިޔަފާރިވެރިއަކު ވަނީ އެ މައުޟޫއަށް ވާހަކަ ދެއްކުމަށް އެއްބަސްވެފައި ނުވާއިރު ބައެއް ވިޔަފާރިވެރިން ރޯދަމަހުގެ ދުވާލު ފިނިކުރި ބުއިންތަކާއި ލުއިކާނާ ވިއްކުން މުޅިން ހުއްޓާލާފައިވާކަން ވެސް ވަނީ ފާހަގަކުރެވިފައެވެ.
ހިތަދޫގައި ބޭކަރީއެއް ހިންގާ ފަރާތަކުން 'އައްޑޫލައިވް'އަށް މައުލޫމާތު ދެމުން ބުނިގޮތުގައި ،ކޮންމެ އަހަރަކުވެސް ރޯދަމަހު ޕާނާށް ޚާއްސަގޮތެއްގައި ޑިމާންޑް ބޮޑުވާ ކަމަށާއި ވިޔަފާރިވެސް 40 އިންސައްތައިގެ ކުރިއެރުމެއް އަންނަ ކަމަށެވެ.
އަދި މީގެ އިތުރުން ފިހާރަތަކުން ޕާނަށް އޯޑަރު ކުރާ އަދަދު ވަރަށް ބޮޑުތަން އިތުރުވެފައިވާ ކަމަށާއި ޚާއްސަގޮތެއްގައި އެކަހެރި ސަރަހައްދުތަކުގައި ހުންނަ ފިހާރަތަކުން އެގޮތަށް އޯޑަރު ކުރަމުން ގެންދާކަމަށް އޭނާ ބުންޏެވެ.
'އައްޑޫލައިވް'ގެ ޓީމުން ހޯދި ހޯދުންތަކުން އެނގިފައިވާ ގޮތުގައި ރޯދަ މަހުގެ ފާއިތުވި 2 ދުވަހުގެ ތެރޭގައި އީސީސީ ސަރަހައްދާއި އީދިގަލި ކިޅި ހުންނަ ސަރަހައްދުގެ ފިހާރަތަކުން އެވްރެޖް ގޮތެއްގައި ދުވާލަކަށް 6 ކޭސް މަސް އަދި 30 ޕާން، އަދި 10 ކޭސް އެނާޖީ ޑްރިންކު ވަނީ ވިއްކައިފައެވެ.
" ކަނޑައެޅިގެން ރޯދަމަހު ދުވާލު ކައި އުޅޭ ގްރޫޕްތަކަށް އެއްޗެހި ވިއްކަން މަޝްހޫރު ފިހާރަތަކެއް އެބަހުރޭ. މިކަން ހުއްޓުވަން އެބަޖެހޭ. މިއީ ހަމަ ހިތްވަރުދިނުން ކަމުގައި ބެލެވިދާނެ. " ފޭދޫ އިން ވާހަކަ ދެއްކި ވިޔަފާރިވެރިޔަކު ބުންޏެވެ.
ދުވާލު ގަޑީގައި ލުއިކާނާގެ ބާވަތްތައް ވިއްކައިގެން އެއްވެސް ފިހާރައަކާއި މެދު އަދި ފިޔަވަޅު އަޅާފައި ނުވި ނަމަވެސް، އެ ފިހާރަތަކުގެ ވެރިން ބަޔަކު މީހުން ފާފައަކަށް އަރައިގަތުމަށް މަގު ފަހިކޮށް ދިނުމަކީ ވަރަށް ބޮޑު ގޯހެކެވެ.
ގަސްދުގައި ރޯދަ ދޫކޮށްލުމަކީ ބޮޑު ފާފައެއް !
އަބޫހުރައިރާ ރަޟިޔަﷲ ޢަންހު ރިވާކުރައްވައިފައި ވެއެވެ. ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘު ކުރެއްވިއެވެ.
"އެއްވެސް ކަހަލަ ޝަރުޢީ ޢުޒުރެއް ނުވަތަ ބައްޔެއްގެ ސަބަބަކާ ނުލައި ރަމަޟާން މަހުގެ ދުވަހެއްގެ ރޯދަ ދޫކޮށްލައިފި މީހާ އެއަށްފަހު އޭނާގެ މުޅި ޢުމުރުގައި ރޯދަ ހިފިކަމުގައި ވިޔަސް އޭނާ ދޫކޮށްލި ރޯދައިގެ ބަދަލަކަށް ނުފުދޭނެއެވެ." (އައްތިރުމިޒީ: ކިތާބުއްޞައުމި)
އާދެ، މިޙަދީޘު ފުޅުން އެނގެނީ ރަމަޟާން މަހު ރޯދަ ހިފުމުގެ މުހިންމު ކަމެވެ. ދީނުގައި އެކަމަށް ދެއްވައިފައިވާ އަހަންމިއްޔަތެވެ. ރޯދައަކީ ޚުދު އަރަހުށި މާތްﷲ ނުހަނު ޞަރީޙު ބަސްފުޅުން ފަރުޟުކުރައްވައިފައިވާ އަޅުކަމެކެވެ. އެހެންކަމުން ރަމަޟާން މަހުގެ ރޯދައެއް ޤަޞްދުގައި ދޫކޮށްލުމަކީ ވަރަށް ބޮޑު ފާފައެކެވެ. ވަރަށްބޮޑު ކުށެކެވެ. ޤަޞްދުގައި ރޯދައެއް ދޫކޮށްލުމަށްފަހު މީހަކު މުޅި ޢުމުރަށް ރޯދަހިފިކަމުގައިވިޔަސް އެކަންވާނީ އެމީހަކު އަމިއްލަ ޤަޞްދުގައި ކުރިކަމަކަށެވެ. މާތްﷲ ގެ ޙުކުމް ފުޅަކަށް ޢަމަލުކުރުން ކަމަކަށެއް ނުވާނެއެވެ. ޝައްކެއްނެތެވެ. މާތްﷲ ގެ އަމުރުފުޅަކާ ޤަޞްދުގައި ޚިލާފުވުމުގެ ބަދަލެއްކަމުގައި ފުދޭނެ އެހެން އެއްވެސް ޢަމަލެއް ނޯންނާނެއެވެ.
ވަލުތެރޭގައި ނުވަތަ ފަޅުގެއެއްގެ ތެރޭގައި ހުރެ ރޯދަ މަހުގެ ދުވާލު ގްރޫޕް ހަދައިގެން ގޮސް ކައިބޮއެ ހަދާއިރު ﷲ ސުބުޙާނަހު ވަތަޢާލާ ބައްލަވާ ވޮޑިގެންވާ ކަން ކޮންމެ ޒުވާނަކުވެސް ހަނދާންކޮށް ، އެފަދަ ބޮޑެތި ފާފަތަކުން ދުރުހެލިވާން އެބަޖެހެއެވެ.