ސްރީލަންކާގެ މަޝްހޫރު ދީނީ އިލްމުވެރިއެއް ކަމުގައިވާ ޝައިޚް މުއިޒް ބުޚާރީގެ ދަރުސްތަކެއް ދެއްވުމަށް އައްޑޫ ސިޓީއަށް ވަޑައިގަންނަވާގޮތަށް ހަމަޖެހިއްޖެއެވެ.
މައުލޫމާތު ލިބިފައިވާގޮތުގައި ޝެއިޚް މުއިޒް ބުޚާރީގެ އިތުރުން ޝެއިޚް އާދަމް ޝަމީމް އަދި އަލް-ޢަސްރު ޓީމުގެ ބައިވެރިން އައްޑޫ ސިޓީއަށް އައުމަށް ހަމަޖެހިފައިވަނީ ރަމަޟާން މަހުގެ 8 ވަނަ ދުވަހުއެވެ.
ރަމަޟާން މަހުގެ 10 ގެ ނިޔަލަށް މުއިޒް ބުޚާރީ އައްޑޫ ސިޓީއަށް ކުރައްވާ މި ދަތުރުފުޅުގެ އިންތިޒާމްތައް ހަމަޖެއްސުމުގައި އިސްކޮށް ޙަރަކާތްތެރިވެވަޑައިގަންނަވާ ޝެއިޚް މުޙައްމަދު އަނީލް 'އައްޑޫލައިވް' އަށް މައުލޫމާތު ދެއްވަމުން ވިދާޅުވިގޮތުގައި ، ދަތުރުފުޅުގައި ދީނީ ދަރުސްތަކާއި، ރޯޑް ޝޯވް އެއްވެސް ބޭއްވުމަށް ހަމަޖެހިފައިވާ ކަމަށެވެ.
ޝައިޚް މުއިޒް ޤުރުއާން ހިތު ދަސްކުރެއްވީ ޢުމުރުން އެންމެ 14 އަހަރުގައެވެ، އަދި އޭގެ ފަހުން ހަދީސް އާއި އަރަބި އިލްމަށް ޚާއްޞަވުމަށް 10 އަހަރު ޢިލްމު އުނގެނިވަޑައިގަތެވެ. މިހާރު ކޮލޮމްބޯގެ އިންޓަނެޝަނަލް އިސްލާމިކް އިންސްޓިޓިއުޓްގެ ޢަރަބި ބަހުގެ މުދައްރިސެއްގެ މަގާމު އަދާކުރަމުންދާ ޝައިޚް މުއިޒު ވަނީ ކޮލޮމްބޯގެ ވެއްލަވައްތަ މިސްކިތުގެ އިމާމުކަމާއި ޚަތީބުކަންވެސް ވަނީ ކުރައްވާފައެވެ.